السر المدفون
الجزء الأول: “الهدية الم*لعونة”
ليلة الحنة.. المفروض إنها أسعد ليلة في حياتي.
البيت كان مليان زغاريد، وصحباتي حواليا بيرقصوا، وأنا “سارة” العروسة اللي الكل كان بيحسدها على عريسها “ياسين”. ياسين مش بس عريس، ده الحب اللي استنيته سنين.
وسط الزحمة، لمحت واحدة واقفة بعيد.. كانت لابسة عباية سودة ومنقبة. ملامحها مش باينة، لكن نظرات عينيها كانت غريبة، كأنها بتبصلي بشفقة مش بفرحة.
قربت مني والكل مشغول بالرقص، مدت إيدها بعلبة قطيفة حمراء صغيرة، وهمست بصوت مبحوح هز جسمي:
= دي أمانة من زمان.. افتحيها وإنتي لوحدك يا سارة.. السر اللي فيها أغلى من الشبكة اللي في إيدك.
اختفت وسط الزحمة قبل ما أنطق بكلمة. قلبي اتقبض، لكن كملت الليلة وأنا بحاول أرسم الابتسامة على وشي.
أول ما الفرح خلص وطلعت أوضتي، قفلت الباب وفتحت العلبة وإيدي بترتعش..
ملقتش دهب.. ملقتش حاجة غالية..
لقيت صورة قديمة جداً، ألوانها باهتة.. صورة ليا وأنا طفلة عندي ٤ أو ٥ سنين، وقاعدة في حضن ست ملامحها مألوفة بس مش قادرة أفتكرها.
قلبت الصورة عشان أشوف مين دي، لقيت جملة مكتوبة بخط أحمر كأنه دم، جملة وقفت قلبي مكانه:
“مبروك يا عروسة.. بس يا ريت تسألي أمك، إزاي هتتجوزي ياسين وهو أخوكي في الرضاعة؟!”
الموبايل وقع من إيدي، والنفس بدأ يضيق.. ياسين؟ أخويا؟
افتكرت كلام ماما دايماً عن مامت ياسين الله يرحمها إنهم كانوا أكتر من إخوات.. بس عمرها ما قالت إننا رضعنا مع بعض!
السر المدفون لمحمد نور
نزلت أجري زي المجنونة، دخلت أوضة ماما لقيتها بتلم هدومها عشان تسافر معايا الصبح.
بصيت لها والصورة في إيدي، وصوتي طالع بالعافية:
= ماما.. ردي عليا.. أنا وياسين رضعنا مع بعض؟
ماما أول ما شافت الصورة، وشها بقى أصفر زي الليمونة.. الملاية وقعت من إيدها، وقعدت على السرير وهي بتنهج وقالت كلمة واحدة خلت الدنيا تلف بيا:
= إنتي عرفتي طريق الست دي إزاي؟!
“الصدمة مش في الجملة.. الصدمة في رد فعل الأم! تفتكروا الأم كانت مخبية السر ده ليه؟ والمنقبة دي تطلع مين؟
الجزء الثاني والأخير: “كذبة الـ 20 سنة”
وقفت قدام ماما والورقة في إيدي بترتعش، وهي وشها جاب ألوان الطيف.. رميت الصورة والورقة في حضنها وصرخت: “يعني إيه يا ماما؟ يعني إيه ياسين أخويا؟ ردي عليا قوليلي إن دي كدبة!”
