قومي اغسلي المواعين
_ لا لا أنت هتروح تروحها دلوقتي وتجيب شبكتك وتيجي ، ولا هي شبهنا ولا تربيتنا …
تفتكروا مريم كانت صح، ولا كان المفروض تقوم تغسل المواعين، وتفتكروا نوح هيعمل أي!
والمفروض يراضي مامته ولا ينصر خطيبته
_ أنت لو عايز تسمع كلام مامتك وتاخد شبكتك مش عندي مشكلة
_مريم أي الكلام إللي بتقوليه دا، أنتِ واعيه بتقولي أي؟!
_ و أنت مش شايف مامتك بتقول أي و إزاي!
لقيت مامته ضحكت بسخرية، و كأنها عايزة فعلًا تخرب كل حاجة
_ شوف باعتك في ثانية إزاي! مش باقيه عليك
_ مامااا.. ماما من فضلك أنتِ بتعملي كدا لي! بتعملي كدا لي و في يوم زي دا، اتقي الله في بنات الناس
_ أنت بتزعقلي!
لقيت أبو نوح داخل بسرعة على صوتهم العالي
_ في أي يا ولاد، في أي يا نوح أنت بتعلي صوتك على والدتك لي!
مسحت على وشي و أنا شايفة الموضوع بيكبر أكتر، فأخدت شنطتي و قولت
_ معلش يا عمو أنا مضطرة استأذن لأن ماعتش ليا وجود هنا بعد ما اتهانت
_ اتهانتي! مين بس إللي يجرأ يعمل كدا في ضفتي و في بيتي!!
_ صاحبة البيت، معلش يا عمو لازم أمشي عن إذنك
مشيت ومستنتش أي رد، ولا حتى نوح إللي جه ورايا وفضل ينادي عليا، لكن أنا نزلت بسرعة
_مريم.. استني يا مريم أنا بتكلم استني
_عايز أي!
_ ممكن تهدي، مينفعش كدا، و أي إللي خد شابكتك هو إحنا بنلعب؟!
_ عايزيني أقول أي بعد ما مامتك هانتني في بيتكوا، دي غلطتي إني جيت يا نوح، دي غلطتي إن سمعت كلامك، مش متخيلة اجي بيتكوا و مامتك تعمل كدا، دا حتى أنا لسه في الخطوبة اومال لو بعد الجواز أي؟!
_ بس أنا مسبتش حقك، ماسكتش عشان تمشي كدا
_ أومال عايزيني أقعد أشرب الشاي!!
_ ممكن تهدي، أنا هتكلم معاها، و مش هتتكرر تاني، أنا قايل لك من الاول مش هيكون ليكي اختلاط بيهم، أنا عارف نظامك إزاي، و موافق عليهم
_ نوح إحنا لو عشنا بالشكل دا هنتعب جامد، هيبقى في مشاكل مش بتخلص، مامتك عايزة نظام مش عندي، هتفضل تديك في كلام، و كل ما تشوفني هتتعامل معايا كدا، إحنا كدا هنتعب
_ أومال أنا جايب شقة بعيد ليىعت بيت العيلة، عشان ميحصلش كدا و نتجنب المشاكل، أنا مش هنكر إن والدتي صعبة و شديدة، بس … أنا ماليش دعوة بيها، وعمري ما هقولك أعملي أو روحي في مكان مش على هواكي طاعتهم و بر والدتي عليا أنا مش عليكي، أنا متأكد أن بابا بيجبلك حقك ومش ساكت، لأن إللي حصل مش إهانة ليكي لا دا ليه هو
