قومي اغسلي المواعين

_ أنا مش قادرة أفكر في أي حاجة، و إللي حصل رعبني وخلاني أفكر أكتر في مستقبلنا سوا

_انتِ عايزة تتخلي عني، مستقبل أي إللي بتفكري فيه، أنتِ شيفاني بمشي على كلامهم أصلًا أنا مليش دعوة بيهم، أنا ماسكتش و ماسبتش حقك عشان تقولي كدا، أنتِ هتتجوزي راجل يعرف ربنا

فاجأة لقيت والد نوح نازل على السلم ولما شافنا لسه واقفين قدام البيت قرب مننا وقال بإعتذار

_حقك عليا يابنتي في إللي حصل دا، أنا ماسكتش، ولو كنتي استنيني دقيقة كنت جبت لك حقك وأنتِ وافقة، أنا ماقبلش أبدًا حد يعمل كدا في ضيفة في بيني، وأنتِ خصوصا فوق دماغي دا أنتِ خطيبة الغالي، و أنا هاجيب والدة نوح و تيجي تعتذرلك مخصوص فيبيتك، دا أنتِ فوق دماغنا

_ تسلم يا عمو الله يخليك، بس أنا..

_حقك تزعلي لو منك هزعل ونعمل مشكلة، بس أنا عارف أنا مربي الواد دا إزاي وعارف أنه ماسابش حقك

_هو ماسابش حقي يا عمو بس أنا مش هكدب عليك أنا خوفت

_والله لو منك تخافي، هي مراتي آه بس تخوف فعلًا

_ بابا حضرتك بتقول أي أنا بحاول اصالحها، دي بتقولي لا أنا هفكر في علاقتنا تاني

_ما عندها حق يابني

_بابا!!!

أبتسم وبص ليا

_مراتي صعبة بس ابني متربي، وعارف يعني أي يتقي الله في بنات الناس عارف قيمتك كويس، وأنا بقولك بنفسي أهو وعلى ضمانتي .. نوح أبني راجل ميتعوضش، و إللي حصل مش هيتكرر و هتعتذر ليكي بنفسها

روحت وكنت مترددة جدًا، وخايفة احكي إللي حصل تحصل مشكلة أكبر، لكن عشان هي هتيجي بنفسها وتعتذر قررت احكي لماما إن حصل سوق تفاهم هناك، ماقولتش كل المشكلة عشان ميبقاش في حزازية و ماما تفضل شايلة منهم و تقلب على نوح نفسه، قولت مقتطفات بسيطة بس، و تجنبت أحكي لبابا لأن حسيت هيفسخ الخطوبة و مش هيقبل أبدًا إللي حصل، بس طبعًا ماما قالت له نفس المقتطفات، وكان مصمم إنه ياخد موقف من نوح، بس قولتلهم إنها هتيجي تعتذر ليا، وبالفعل جت مع والد نوح و نوح

و اعتذرت، آه من ورا قلبها بس جت لحد هنا و اعتذرت

_ ممكن تشيلي كدا الوساوس من دماغك، مش هيحصل حاجة، و متخافيش أنا جنبك، و مش هجبرك تعملي حاجة مش على مزاجك، ولا هسيب حد يزعلك أبدًا

_توعدني؟!

_ أوعدك، يا مريم أنا مش اخدك من بيتك عشان ابهدلك أو تتهاني، لا أنتِ تتشالي على الراس، و المكان إللي ميحترمش وجودك، يبقى محترمش وجودي أنا كمان و أنا مش بسكت