قومي اغسلي المواعين

_ لا لا مش عاجبني إللي أنت بتقوله دا، ما مرتات أخواتك أهم كانوا بيجوا ويعملوا كل حاجة، ويتعودوا على البيت، أنت كدا بتعمل خلاف بينهم، وهتخليهم يبصوا لبعض

_ يا ماما كل واحد حر في إللي بخصه، مليش دعوة بزوجات أخواتي، أنا ليا دعوة بمريم، ومريم مش ملزمة تعمل حاجة، لا دلوقتي ولا بعد الزواج

_ يوه وظا اسمه أي دا بقا

_ إسمه الأصول

_ لا دي مش الأصول إللي نعرفها

حسيت إن محاصرة جدًا و الكلام عليا سبب ليا الإحراج، وكنت عايزة أمشي، فقومت وقفت

_ طب معلش يا جماعة لازم استأذن

_ يوه شوف البت اتقمصت إزاي، إحنا بنتكلم في الأصول إللي اتربينا عليها هتلوي وشك

نوح قام وقف وقال بعصبية شوية

_ماما مينفعش كدا يا ماما

_ هو أي إللي مينفعش مش شايف عمايلها؟

لكن أنا قولت بدل نوح، لأن ماقدرتش أسكت أكتر من كدا، أنا مش ضعيفة، لكن مش بحب اتناقش في حاجة تخصني على الملأ كدا

_ أنا مش مقموصة يا طنط ولا لاوية وشي، وبعدين الأصول و الأعراف متغيرة مش تعليمات من ربنا نازلة ولازم أمشي عليها، و أنا ماشية بالأصول إللي اتربيت عليها و عرفاها، مش بتكبر أو بعمل حاجة ترفع على حد، أنتم ماشيين بإصولكوا، وأنا ماشية بأصول بيتنا

_خلاص يا مريم يلا عشان اروحك، عن اذنكوا يا جماعة

لكن مامته برضو مسكتتش وهي بتشاور ليا

_ لالا انتِ بتردي و مخالفه لأصول بيتنا، مش هتنفعي معانا لا، هتقومي ستات ولادي عليا، و هتعملي مشاكل

_ حضرتك قصدك أي بقا يا طنط، هو أنا هتجوز البيت كله وهعيش هنا، ولا أعيش مع نوح في بيتي

_لي هو أنتِ مش ناوية تيجي هنا ولا أي

نوح اتعصل جامد ومسح على وشه

_ ماما من فضلك مينفعش نتكلم في حاجة زي دي دلوقتي، و المناقشة اصلا هتاخد منحنى هندخل فيه في مشكال، هنتكلم بعدين، يلا يا مريم

_ لا مش هتخرج من هنا، غير لما نشوف الموضوع دا، دا شكل الخطوبة المعوجة دي مش هتكمل

_ ماما أي إللي حضرتك بتقوليه دا؟!

_لا ثواني كدا بقا معلش أنا ساكته من ساعة ما جيت، في أي يا طنط حضرتك عايزة مني أي، مش طايقاني لي و عايزة أي مشكلة من الصبح

_ أنتِ بتعلي صوتك عليا لا دا متنفعش خالص مش عجباني

_ ما أنا مش ملزمة اعجبك، و بعدين حضراتك إللي بتطريني أعلي صوتي و بتعيبي فيا من ساعة ما جيت