قومي اغسلي المواعين
_ قومي اغسلي المواعين يا مريم يلا وحنان هتساعدك
_ أغسل المواعين! بس دا مايصحش يا طنط، أنا..يعتبر لسه ضيفة
_ضيفة دا أي مش بقيتي خطيبة ابني وفطرتي معانا! قومي بقا ساعدي حنان أنتِ بقيتي واحدة من هنا
_سوري يا طنط، بس أنا مينفعش أعمل كدا، لو ماما عرفت هتزعق جامد
_لي يعني هو أنتِ بتعملي حاجة غلط، وبعدين بتحطي حدود لي، مش بقتي خطيبة أبني! يعني واحدة من أهل البيت
_وهو ينفع لسه في تاني زيارة ليا أقوم اغسل مواعيين، إحنا مش عندنا كدا
_انتِ شكلك مش ست بيت شاطرة
بصيت لنوح بضيق أول ما دخل الصالة بعد ماكان بيصلي، وكنت حاسه بعدم راحة في القاعدة بعد الكلام إللي اتقال، أعتقد إن ذوقيًا واللي متعودة عليه، إن مساعدتي في غسل المواعين بتبقى مبادرة مني، بس أنا قالوا ليا أساعد بس في حط الأكل وشيل الأكل، دي يعتبر تاني مرة اجي عند حماتي بعد الخطوبة، مش معقول نطلب مني كدا، أنا يعتبر لسه ضيفة و المفروض اعزز نفسي
_مالك يا مريم مضايقة لي كدا في!
_ في موضوع هقولك عليه بعدين
_ حصل حاجة ولا أي، حد ضايقك!
_ آه يا نوح، هنتكلم بعدين
ماكنتش ناوية أتكلم دلوقتي وابوظ القاعدة، لكن لقيت مامته قالت فاجأة، لما لقيتنا بنتوشوش
_شايف خطيبتك بتعتبر نفسها غريبة يا نوح ومش واحدة مننا،و معتبرة نفسها ضيفة يرضيك!
_لي في أي، مالك يا مريم حصل أي!
سكت ومتكلمتش وماكنتش حابه اتناقش في الموضوع دا في الوقت دا وقدام كل إللي قاعدين، لكن كلمته قالت
_مش راضية تقوم تساعد اختك في غسل المواعين، يرضيك
نوح بص ليا و أبتسم وقال بهدوء
_ما عندها حق يا أمي، أنا مش جايب مريم عشان تغسل المواعين، مايصحش هي تتشال على الراس
_ لي كدا بتعمل حدود وتخليها ضيفة لي!
_عشان هي فعلًا ضيفة يا أمي
_ برضو! دا أنت عايز تزعلها!
_ لا أكيد مش هزعلها، أنا لو خليتها تعمل المواعين في بيتنا، أنا كدا أزعل من نفسي وهي تزعل مني، و بعدين المواعين مش واقفة على مريم يعني، و بعدين مريم متبقاش ضيفة في بيتها هي، لكن هي هنا ضيفة و تقعد معززة مكرمة
_ و أنت كدا هتعرف هي ست بيت شاطرة ولا لا منين، ما يمكن مش بتعرف تغسل المواعين أو تعمل حاجة
_ لا أنا واثق فيها، وعارف إنها ست بيت ممتازة، وبعدين لما بروح عندهم بتعمل أحسن أكل و كل حاجة تمام يا ماما متقلقيش
