ترابيزة الغسل

طيب المية دي جت منين، وليه تحديدًا على ترابيزة الغُسل وحوليها رغم إن الحنفية بعيد عنهم، وليه باقي المكان ناشف، فضلت أسأل هنا وهناك لكن الكل أجمع إن المكان استحالة يكون اتفتح امبارح وأنا مش موجودة، وغصب عني قررت أتجاهل الموضوع عشان أقدر أشوف شغلي..

وجتلي متـ,ـوفية تانية وبدأت أغسلها، لكن الغريب إني لما حطتها على الترابيزة حسيت إنها بتتـ,ـوجع، وكأني سمعت صوتها في وداني، وكل ما كنت بحاول أغسلها على الترابيزة كانت بتحصل حاجة، مرة المية تدلق، مرة المتـ,ـوفية تفرد إيديها بصورة غريبة، مرة تتقلب وكأنها عايزة ترمي نفسها، وفضلت أعاني لحد ما ربنا ألهمني ونقلتها على ترابيزة تانية مكنتش باستخدمها، والغريب إن الأمور هديت تمامًا وغسلتها..

وفضلت محتارة بصورة أكبر لحد ما جت المتـ,ـوفية اللي بعدها، وفوجئت بنفس الأمور بتحصل لما بحطها على الترابيزة اللي متعودة استخدمها، ولما كنت بستخدم الترابيزة التانية كانت بتقبل إنها تتغسل عادي، وكأن الترابيزة دي بقت رافضة تستقبل أمـ,ـوات مرة تانية..

والأغرب إني بقيت باجي كل ليلة ألاقي الترابيزة واللي تحتها عليهم مية، وكأن كان فيه حد بيتغسل عليهم، ورغم إني بقيت حريصة بصورة أكبر إن الموضوع ميتكررش وبقيت بتأكد ألف مرة إن المكان ناشف، إلا إن الموضوع كان بيتكرر كل يوم، لحد ما قررت أعمل حاجة غريبة شوية..

اشتريت كاميرا مخصوص من محل إلكترونيات وكلمت ابن أختي وجه ركبهالي وقالي إنها هتسجل اللي بيحصل طول الليل لحد تاني يوم الصبح، وفعلًا فضلت مترقبة تاني يوم لحد ما أشوف إيه اللي بيحصل في المكان..

وتاني يوم جريت على الكاميرا وحاولت أشغل التسجيل لكني معرفتش، كلمت ابن أختي وبدأ يشرحلي وفضلت أعاني يمكن نص ساعة لحد ما قدرت في النهاية أشغل الفيديو، وشوفت حاجة أغرب من الخيال..

شوفت مدير المستشفى ومعاه اتنين ممرضين أعرفهم داخلين بجـ,ـثة عليها آثار دـ,ـ م، حطوها على الترابيزة وبعدين سابوها، وشوفت بعدها مشهد غريب، ناس معرفهمش كلهم ستات، غسلوا الجـ,ـثة في أقل من دقيقة، وبعدين رجع المدير والممرضين خرجوا الجـ,ـثمان من باب المغسلة..

كنت هتجنن من اللي شوفته، روحت سألت الممرضين بطريقة مفيهاش اتهام وعرفت إن واحد منهم كان أجازة امبارح أصلًا، وعرفت إن مدير المستشفى مسافر، أمال أنا أيه اللي شوفته ده، شغلت الفيديو تاني قدام حد بثق فيه واتفاجئت إن مفيش أي حاجة، مجرد مغسلة فاضية تمامًا مفيش فيها أي حاجة..