كنت رايحه المركز الطبي – منى السيد

من قدامهم ودخلت أوضتي وقفلت الباب بالمفتاح، أخدت بنتي في حضڼي وقعدت على الأرض أعيط بحړقة. حسيت بمهانة ما عشتهاش في حياتي كلها. طول عمري عايشة في بيت أهلي معززة مكرمة، عمري ما سمعت كلمة تجرحني، والنهاردة عشان حتة لحمة كان هيتمد عليا الإيد، وكل ده عشان إيه؟ عشان حماتي تثبت إنها المسيطرة وإن كلمتها هي اللي تمشي، وحتى لو الجزار بدلها واداني أحسن قطعة، لازم تكسرني وترجعني تاني وتالت عشان تحس بنشوة التحكم.
المغرب أذن، والبيت برة كان هادي بس الهدوء ده كان وراه بركان. قمت غسلت وشي، وبنتي نامت من كتر البكا. مسكت التليفون ولقيت ماما رانة عليا أكتر من أربع مرات. كنت خاېفة أرد عليها تسمع صوتي المبحوح وتفهم، أمي مريضة ضغط وسكر ومش حمل صدمات، بس في نفس الوقت مكنتش قادرة أكتم في قلبي أكتر من كده.
أول ما رديت، ماما قالت بلهفة
إيه يا حبيبتي ما جيتيش ليه؟ واللحمة معاكي؟ أنا محضرة الفلوس ومستنياكي تجيلي عشان نتغدى سوا ونهدي أعصابك.
بلعت ريقي وحاولت أطلع صوتي طبيعي على قد ما أقدر
معلش يا ماما، أصل البنت سخنت شوية بعد التطعيم وما عرفتش أنزل بيها في الهوا، ووائل قال خلاص خلو اللحمة هنا وهو هيتصرف معاها.
ماما سكتت شوية، وكأن قلب الأم حس إن ورا الكلام حكاية تانية، وقالت بصوت هادي بس مليان قلق
وائل زعلك يا بنتي؟ حماتك قالتلك حاجة لما عرفت؟
ما قدرتش أتمالك نفسي، خانتني دمعة نزلت ڠصب عني، بس مسحتها بسرعة وقلت
لا يا ماما ما فيش حاجة، بس شوية لخبطة وتعب من مشوار المركز. هعدي عليكي بكرة الصبح إن شاء الله وأشوفك.
قفلت مع ماما، ولقيت الباب بيخبط خبطات جامدة ومتتالية. فتحت الباب، لقيت حماتي واقفة وبتبصلي بطرف عينها
اطلعي عشان تعملي الأكل، ولا ناوية تفضلي حابسة نفسك وتسيبي جوزك جعان بعد يوم شقاه في الشغل؟
قلت بهدوء من غير ما أبصلها
حاضر، طالعة.
خرجت على المطبخ، لقيت كيس اللحمة محطوط على الرخامة. فتحت الكيس ووقفت قدامها وأنا بقطع البصل والدموع بتنزل من عيني مش من البصل، لكن من حړقة قلبي على نفسي. وائل دخل المطبخ، وقف ورايا من غير ما يتكلم، حسيت بيه بس ما التفتش. مد إيده وفتح التلاجة خد إزازة مية وشرب، وبعدين قال بنبرة جافة
أمي عايزة الشوربة تكون خفيفة، وما تكتريش البهارات عشان معدتها، والرز يتعمل بالشعرية زي ما بتحبه.
ما رديتش عليه، فضل واقف مستني رد، ولما سكت قال بنرفزة
أنا بكلمك على فكرة! ما بترديش ليه؟!
بصيت له بعينين مليانة عتاب وبرود
حاضر يا وائل، هعمل الشوربة خفيفة والرز بالشعرية. في تعليمات تانية لحضرتك أو للوالدة؟
اتضايق من أسلوبي البارد وقال
بطلي الطريقة دي، وبطلي تعملي فيها المظلومة اللي الكل جاي عليها. إنتي لو بتسمعي الكلام