جوزي سافر – محمد نور

جوزي سافر أفريقيا لمدة خمس سنين. عيطت في المطار… ولما رجعت البيت حوّلت الثمانية مليون جنيه! لما "كريم" قالي إن الشركة هتبعته أفريقيا لمدة خمس سنين، عيطت وأنا بشوفه بيختفي ورا بوابات السفر. حماتي أخدتني في حضنها وقالتلي: — ما تعيطيش يا "نورهان".. الخمس سنين هيعدوا في ثانية. هزيت رأسي وأنا مش قادرة أتكلم. بس هي كانت غلطانة. أنا مكنتش بعيط عشان هتوحشني. أنا كنت بعيط على التلات سنين من عمري اللي اكتشفت للتو إني ضيعتهم على الفاضي. بعد ساعتين بس من رجوعي من المطار، دخلت البنك وحوّلت الثمانية مليون جنيه اللي كانوا في حسابنا المشترك.. كلهم بالكامل. كريم كان عنده خمسة وتلاتين سنة، مدير في شركة مقاولات كبيرة، بمرتب يخلي أي أم تتمنى تجوزه لبنتها، وأب وأم متقاعدين شكلهم ناس طيبين ولطاف جداً. لما اتجوزنا، صاحباتي قالوا لي إني سحبت ورقة اليانصيب الكسبانة. بس بعد تلات شهور بس، فهمت إن الجايزة دي فيها حاجة غريبة. جوزي عمره ما قربلي.. ولا حتى في ليلة دخلتنا. في الأول قال إنه مجهد وتعبان. بعدها قال إن الشغل كتير عليه. وبعدين قال إننا لازم نستنى لما ياخد الترقية الجاية. في عيد جوازنا لبست قميص نوم جديد، كريم بصلّي بصة سريعة وقالي: — عندي اجتماع الساعة سبعة الصبح بكرة. ودار وشه ونام. شهور وأنا فاكرة إن المشكلة فيا أنا. نزلت الجيم، اتعلمت أطبخ الأكلات اللي بيحبها، وبدأت أقرأ المجالات الاقتصادية اللي بيسيبها على الترابيزة.. ولا حاجة اتغيرت. كنا عايشين زي اتنين مشاركين في إيجار شقة. النداء الوحيد اللي كان بيأكد إن ده "جواز" كان بيجي يوم 15 في الشهر: التحويل اللي بيعمله بانتظام لحسابنا المشترك. في تلات سنين، جمعنا أكتير من تمانية مليون جنيه. لحد ما جه يوم رأس السنة.. حماتي، "ماجدة"، حطتلي حتة لحمة في طبقي وابتسمت وقالت: — تلات سنين متجوزين ولسه مفيش بيبي؟ كريم كمل أكل عادي. فكملت كلامها: — يمكن مفروض تعملي فحوصات وتروحي لدكاترة.. لو مش قادرة تحملي طبيعي، فيه دكاترة وحقن مجهري. بصيت لجوزي وأنا مستنياه يقول حاجة. كريم ساب الشوكة والسكينة وقال: — ماما عندها حق.. السنة دي لازم نجيب طفل. في اللحظة دي حسيت ببرودة في جسمي كله. بالنسبة له، أنا مكنتش زوجة.. أنا كنت مجرد "رحم" متاح، وواحدة بتدير حساباته. ورغم كل ده، غصبت نفسي أصدق وأكمل.. لحد يوم 8 مارس. كريم كان بيجهز لسفرية شغل لمدة أسبوعين لنيجيريا. وأنا برتب الجاكيت بتاعه، لقيت ظرف في الجيب الداخلي. جواه كان فيه صورة.. كريم حاطط إيده على وسط ست بلونداء قدام بيت كبير جداً، والاتنين بيبتسموا زي ما يكونوا عرسان جُداد. على ظهر الصورة كان مكتوب: "بيتنا.. مستنيين ترجع بالسلامة." والتاريخ كان ديسمبر اللي فات. نفس ديسمبر اللي كريم قال لي فيه إنه محبوس في مشروع بعيد في نيجيريا والشبكة هناك وحشة جداً ومش عارف يكلمني! رجعت الصورة مكانه. ما صرختش.. ما عيطتش. فتحت اللابتوب.. راجعت حسابات وحركات التلات سنين اللي فاتوا، الرحلات، الكروت، والتواريخ. وفجأة، كل حاجة بقت واضحة زي الشمس. كريم كان بيرجع البيت يومين بس في الشهر.. يوم 19 ويوم 20. وكان دايماً بينام على الكنبة. أنا كنت ببلع كل مبرر وبيتقال لي عشان كنت خايفة أسأل السؤال الوحيد اللي إجابته ممكن تهد حياتي: هعمل إيه لو اتطلقنا؟ كان عندي اتنين وتلاتين سنة، سبت شغلي ومستقبلي لما اتجوزت، الشقة اللي قاعدين فيها متسجلة باسم أمه، وقتها تقريباً كل فلوسنا كانت في الحساب ده. عشان كده، لما كريم أعلن إن الشركة هتبعته بره مصر لمدة خمس سنين، حسيت بحاجة عمرها ما جت على بالي.. حسيت بالراحة! خمس سنين وقت كافي جداً عشان أرجع أبني حياتي من جديد. في المطار عيطت، وهو حتى باسني على أورتي وقاللي: — خلي بالك من نفسك. — وانت كمان. أول ما طيارته طلعت، أنا مابقيتش مراته.. كان فاضل بس هو يكتشف ده. في نفس اليوم الضهر، بعد ما خرجت من البنك، جالي اتصال من سمسارة عقارات: — مدام نورهان، صاحب البيت اللي شفتيه امبارح وافق ينزل نص مليون جنيه.. لسه مهتمة؟ بصيت في تليفوني على رسالة تأكيد التحويل وقلت لها: — تجهّزي العقد. — هتاخديه قسط ولا تمويل؟ — لا.. سكت ثواني وقلت: — هدفع كاش بالكامل. البيت كان فيه جنينة.. جنينة صغيرة مش ضخمة، بس من وانا صغيرة كان نفسي في بيت بجنينة. لما حكيت لكريم عن الحلم ده من سنين، ضحك وقال لي: "الأرض بتكلف ثروة، عاوزة جنينة تعملي بيها إيه؟" دلوقتي بس عرفت الإجابة: عشان أنا عاوزة كده. ولأول مرة من تلات سنين، السبب ده كان كفاية جداً. مضيت العقد باسمي أنا بس. بعدها رجعت شقة حماتي.. ماجدة كانت قاعدة بتتفرج على التلفزيون: — كريم وصل بالسلامة؟ — اه. — لازم تاخلي بالك منه أكتر من كده.. الرجالة بتتعب بره، وانتي حاولي ما تصرفيش فلوس على الفاضي. قلعت الجاكيت بتاعي ببطء. في اللحظة دي، التليفون اللي كان على الترابيزة جنب ماجدة بدأ يرن. على الشاشة كان مكتوب اسم ابنها: كريم. حماتي ردت وهي مبتسمة: — أهلاً يا حبيبي.. كان فيه لحظات سكوت على الناحية التانية.. وبعدها سمعت صوته بوضوح: — ماما… سكوت تاني.. — هي نورهان فين؟ ماجدة بصت لي، والابتسامة اختفت من وشها: — هي هنا أهي.. كريم أخد نفس عميق وصوت شهقته كان مسموع في الصالة كلها: — قولي لها تبص في تليفونها! تليفوني اتهز في إيدي.. رسالة من البنك لسه واصلة، وتحتها رسالة ثانية من كريم.. كانت فيها 4 كلمات بس: "عملتي إيه في فلوسي؟!" الجزء الثاني والأخير قرأت الرسالة مرتين: "عملتي إيه في فلوسي؟" مش "فلوسنا".. مش "تحويشتنا".. مش "إيه اللي حصل؟".. "فلوسي!" تلات سنين جواز تلخصوا في الكلمتين دول. "ماجدة" كانت لسه ماسكة التليفون على ودنها وبتبصلي بذهول: — نورهان.. إيه اللي بيحصل؟ مدت إيدها بالتليفون ناحيتي: — كريم عاوز يكلمك. — خليه يكلمني أنا على تليفوني. — هو بيكلمك دلوقتي أهو! — لا.. هو بيكلم أمه عشان هي اللي تديني التليفون. ماجدة فتحت بقها وهي مش فاهمة. أخدت شنطتي: — أنا ماشية. — استني! كريم شكل سمع صوتي فبدأ يصرخ من التليفون: — نورهان! إياكي تمشي! وقفت عند الباب. خلال تلات سنين، الصوت ده عمره ما اترفع عليا.. لا لما كنت بتعب.. ولا لما كنا بنختلف.. ولا حتى لما عيطت لما نسي عيد ميلادي للمرة التالتة على التوالي. بس التمانية مليون جنيه عملوا في 10 ثواني نبرة وصوت أنا عمري ما سمعتهم منه في تلات سنين! لفيت ودمي محروق وقلت: — افتحي السبيكر يا طنط. ماجدة فتحت السبيكر وهي إيدها بتموت. — الفلوس فين؟! — صرخ كريم. — في مكان أمين. — الحساب ده بتاعنا إحنا الاتنين! — بالظبط! سكت ثواني.. وبعدها قال بنبرة أهدى بس مغلولة: — رجعي الفلوس. — لما ترجع بالسلامة نبقى نتكلم. — أنا مش هسافر ولا هتحرك بسبب الحركة دي! — خلاص.. يبقى عندنا وقت طويل نفكر. ماجدة وشها بدأ يصفر، وقالتلي بصوت مرعوب: — انتي حولتي الفلوس بجد؟ بصيت لها: — اه. — كلها؟! — كلها. الست وقفت فجأة وصرخت: — انتي اتجننتي؟! كريم صرخ تاني من التليفون: — يا ماما سيبيني أكلمها! أخدت التليفون منها وقلت: — سامعاك. نفسه اتغير.. مابقاش يصرخ، بدأ يحاول يتحكم في نفسه. ده "كريم" اللي أعرفه: الراجل اللي عمره ما بيفقد أعصابه لو يقدر ياخد اللي هو عاوزه بكلمة هادية وباردة. — نورهان.. الموضوع ده جاد جداً ومش لعبة. — وكمان لما تكون تجوز عليا وعامل حياة تانية كان موضوع جاد جداً. السكوت على الناحية التانية كان مرعب.. لدرجة إني كنت هبتسم. ماجدة بصت لي وهي مش فاهمة حاجة: — ست مين؟! كريم رد بسرعة وحشرجة في صوته: — أنا مش فاهم انتي بتتكلمي عن إيه! — البيت يا كريم.. الصورة بتاعة ديسمبر اللي فات.. وانت حاضنها قدام بيت كبير ومكتوب عليها: "بيتنا.. مستنيين ترجع بالسلامة"! ماجدة لفت للتليفون بذهول: — كريم! إيه الكلام ده؟! — ماما لو سمحتي ما تتدخليش! الجملة دي كانت تأكيد أكتر من أي اعتراف. وش حماتي اتغير.. مكنش غضب، كان خاف وحيرة. وفهمت في اللحظة دي إنها يمكن كانت عارفة اكتر ملي أنا كنت متخيلاه! — مين دي؟ — سألت. — زميلة شغل. — وانت بتحضن زميلات الشغل كدة؟ — انتي بتكبري المواضيع وبترسمي سيناريوهات مالهاش وجود! — ممتاز.. طالما مالهاش وجود، يبقى أكيد مش هتمانع إن محامي يراجع حساباتنا وشغلنا. كريم أخد 3 ثواني عشان يرد: — محامي إيه؟! أهو ده.. الخوف! صغير.. بس حقيقي وواضح في صوته. — تصبح على خير يا كريم. — نورهان!! قفلت السكة في وشه. ماجدة مسكت إيدي بقوة: — انتي مش هتمشي من هنا غير لما تفهميني انتي عملتي إيه! بصيت لإيدها اللي مسكاني.. فسابتني. — اشتريت بيت. نفسها اتطوع: — إيه؟! — بيت.. بجنينة. — بفلوس كريم؟! — بفلوس من الحساب المشترك بتاع جوازنا. — الفلوس دي ابني اللي تعب فيها وجابها! ابتسمت من غير نفس: — غريبة!.. لما كنتم عاوزين حفيد كان اسمه "جوازكم ورزقكم إحنا الاتنين"، ولما جينا للفلوس، فجأة بقت كلها ملك كريم! أخدت مفاتيحي: — نورهان.. لو خرجتي من الباب ده... — هتعملي إيه؟ ماقدرتش تكمل الكلام.. لأننا إحنا الاتنين كنا عارفين حاجة محدش قالها بصوت عالٍ قبل كده: الشقة دي مش بتاعتي، وأنا ماليش أي حاجة أخسرها هنا. — بكرة هجي ألم هدومي وأحاجاتي. ومشيت. أول ليلة في بيتي الجديد نمت على مرتبة في الأرض. مكنش فيه ستائر، الصالة شبه فاضية، والجنينة فيها ورق شجر ناشف عند السور.. بس تنفست بحرية أكتر من أي ليلة في التلات سنين اللي فاتوا. الساعة تلاتة الفجر ولسه ما نمتش. تليفوني فيه 47 مكالمة فائتة: 20 من كريم، 17 من ماجدة، والباقي أرقام غريبة. عملت التليفون صامت ونمت. الساعة سبعة الصبح كلمت "سارة".. زميلتي من أيام الكلية. دلوقتي هي محامية متخصصة في قضايا الأحوال الشخصية والطلاق والتركات. كنا بعدنا عن بعض بعد جوازي.. في الحقيقة أنا أبعدت عن الكل. كريم عمره ما منعني أشوف صحابي، مكنش محتاج يمنعني.. كل ما أخطط لخروجة يطلع سفر مفاجئ، عزومة عند أهله، تصليح في الشقة.. لحد ما عالمي صغر وبقى يادوب على قد شقة أمه! — انتي متأكدة إنك عاوزة تعملي كده؟ — سألتني سارة. — ولأول مرة في حياتي، أيوا متأكدة. — تمام.. يبقى مش عاوزة تخبي عليا ولا فتفوتة، حتى الحاجات اللي ممكن تطلعك غلطانة. — موافقة. قعدت ساعتين أحكيلها عن جوازي كله. لما خلصت، سارة سكتت فترة وقالت: — فيه حاجة مش مظبوطة. — إيه هي؟ — تمانية مليون جنيه في تلات سنين مش راكبة خالص مع المرتب اللي بتقولي عليه! — كريم كان بياخد مكافآت وبونص عالي. — بونص ستة مليون؟! ما عرفتش أرد. سارة فتحت كشوفات الحسابات اللي أخدتها معايا، وشاورت على كذا سطر: — بصي هنا.. مرتب كريم كان بيزل بانتظام، البدلات والمكافآت.. بس كل فترة، كان فيه تحويلات أكبر بكثير بتدخل الحساب: 300 ألف.. 500 ألف.. 800 ألف! كلها جاية من شركات بأسماء أنا عمري ما سمعت عنها. — كنت فاكراها أرباح مشاريع.. سارة هزت رأسها بالرفض: — ممكن تكون كدة.. بس أنا لازم أراجعها بنفسي. حسيت بنغزة في بطني: — هو أنا في مشكلة؟ — لسه مش عارفين.. كلمة "لسه" خوفتني أكتير من كلمة "أيوا". — وفيه حاجة تانية — كملت سارة — ليه كريم كان بيسيب كل المبالغ دي في حساب مشترك انتي ليكي صلاحية كاملة عليه؟ أنا كمان سألت نفسي السؤال ده! كريم كان دقيق جداً لدرجة مرعبة.. بياخد فواتير من 6 سنين، بيكرر تغيير الباسوردات كل 3 شهور، وبيقرأ العقد 3 مرات قبل ما يوقع.. طب إزاي يسيب ثروة زي دي في حساب مشترك معايا؟ سارة قفلت اللابتوب وقالت: — يمكن كان بيثق فيكي جداً. — هو مكنش بيحبني أساساً! — أنا مقلتش إنه بيحبك.. بصت لي بتركيز وقالت: — أنا قلت إنه كان واثق إنك عمرك ما هتمشي وتسيبيه! الجملة دي فضلت ترن في ودني طول اليوم. كريم رجع بعد 10 أيام بس.. مش بعد 5 سنين! "سفريته الاستراتيجية لأفريقيا" طلعت مش مهمة أوي أول ما التمانية مليون جنيه اختفوا! وصل بيتي الجديد الساعة تسعة بالليل.. أنا مكنتش أديته العنوان، وده معناه إنه جاب حد يراقبني أو استخدم علاقاته عشان يعرفه. شفت عربيته من الشباك. نزل وهو لابس زي العادة: بالطو غامق، قميص مكوي بالملي، ووشه خالي من أي تعابير. لثانية واحدة حسيت بخوف.. بس بصيت لجنينتي، لبيتي، ولبابي.. وافتكرت إني مش مجبورة أفتح له. ضرب الجرس.. مرة.. اتنين.. خمسة. في الآخر اتكلمت في الإنتركم: — عاوز إيه؟ — عاوز أتكلم. — اتكلم من عندك. — أنا مش هتكلم معاكي من ورا باب! — خلاص يبقى مش هنتكلم خالص. — نورهان.. عرفت النبرة دي.. نبرة الصبر المزيفة اللي بيستخدمها لما يكون شايف إني بتصرف بـ "هبل وطفولية". — أنا عارف إنك زعلانة ومجروحة. كنت هضحك: — زعلانة ومجروحة؟! — الصورة ليها شرح وتوضيح. — أنا سامعاك.. وضح. — افتحي الباب الأول. — لا. سكت 10 ثواني وبعدين قال: — الست اللي في الصورة اسمها "سوفي".. استشارية خارجية في الشركة. — والبيت؟ — مشروع عقاري تبع الشركة. — وكلمة "بيتنا"؟ — هزار بايخ! — ضحكتني والله! — نورهان ما تبقيش طفلة! أهو ده كريم الحقيقي.. ما يقدرش يكمل مكالمة لو مكنش هو اللي ماسك زمام الأمور وبيعلم اللي قدامه الصح من الغلط! — عاوز تعرف إيه هو الطفولي بجد؟ — قلت له — إنك توهم ست لمدة تلات سنين إنها متجوزة وهي مجرد كومبارس في حياتك بتأدي دور وخلاص! — أنا عمري ما خدعتك! — انت عمرك ما لمستني يا كريم! سكت. — ده ما يثبتش حاجة.. — خلاص أثبتلي انت حاجة واحدة.. — إيه؟ — قول لي انت اتجوزتني ليه؟ كريم أخد وقت طويل أوي عشان يرد: — لأنك كنتي مناسبة! حسيت بحاجة جوايا انكسرت للأبد.. مش وجع، لكن وضوح ونور! — شكراً يا كريم. — على إيه؟ — لأنك لأول مرة تقول الحقيقة. قفلت الإنتركم. فضل واقف قدام الباب يجي 20 دقيقة.. وبعدها مشي. تاني يوم الصبح وصلني إعلان دعوى طلاق.. ومعاها اتهام أوطى بكثير: كريم بيتهمني إني سرقت وتم استيلاء غير مشروع على أموال الأسرة، وبيرفع قضية يطالب باسترداد المبلغ فوراً! حماتي شهدت إني من شهور بظبط عشان أستولي على تحويشة ابنها. اتنين من قرايبه قالوا إني ست "مفجوعة فلوس ومعنديش أصل". واحدة قريبته حتى قالت إنها كانت شاكة فيا من زمان عشان سبت شغلي أول ما اتجوزت! لأول مرة أفهم ميزة العائلات الكبيرة.. دايماً فيه حد جاهز يشهد بغير الحقيقة ويألف سيناريو ما حصلش! بس كريم عمل غلطة عمره.. كان فاكر إني لسه الست اللي بتمضي على أي ورقة من غير ما تقرأها. خلاص.. اللعبة اتغيرت. سارة قدرت توصل لـ "سوفي". مكنتش صعبة.. الصورة كانت متتاخدة قدام عقار متسجل باسم شركة استثمارية، واحد من مديريها هو أخو سوفي.. والمدير التاني كان.. كريم! لما سارة حطت الورق قدامي، جالي هبوط: — من إمتى؟ — من 4 سنين.. — إحنا متجوزين من تلات سنين بس! — بالظبط.. الشركة دي كانت موجودة من قبل جوازكم أساساً. — يعني هي كانت معاه من قبلي؟ — يظهر كدة. — طب اتجوزني أنا ليه؟! سارة قلبت الصفحة: — هنا بقى مربط الفرس! كريم كان بيشتري أسهم في الشركة دي عن طريق شركة وسيطة.. جزء من الفلوس كان من مرتبه، والجزء التاني.. — منين؟ — من الحساب المشترك بتاعكم! اتسمرت في مكاني: — مستحيل! أنا مراجعة الحسابات، مفيش تحويلات كبرى اتعملت! — لأنه مكنش بيحول مبالغ كبيرة مرة واحدة.. كان بيسحب مبالغ صغيرة متفرقة ومتقسمة ومكتوبة على إنها مصاريف سفرية، بونات، ومصاريف مشروع! سارة وريتني قائمة: فنادق، استشارات، طيران، حجوزات.. ألوفات ورا ألوفات على مدار تلات سنين! — كام إجمالي المبالغ دي؟ — لحد دلوقتي طلعت ما يعادل أكتير من مليون جنيه! حسيت بغثيان.. وأنا كنت بطفى النور في الشقة عشان أوفر كهرباء، كريم كان بيفتح بيت تاني وبيصرف على حياة تانية! وأنا بقارن الأسعار في السوبرماركت، هو كان بيشتري عفش لبيت تاني! وأنا حماتي بتقولي ما تصرفيش فلوس على الففاضي، ابنها كان بيمص الفلوس من الحساب اللي مسميينه "حساب العيلة"! —يه حاجة كمان يا نورهان — قالت سارة. كنت بدأت أكره الجملة دي.. — إيه تاني؟ — سوفي عندها بنت.. الصورة ظهرت على الشاشة: بنت صغيرة عندها يجي 5 سنين، شعرها فاتح وعينيها غامقة، قاعدة على كتف كريم في البحر.. والتاريخ كان من سنتين فاتوا. ما سألتش.. بس حبيت أسمعها: — بنته؟ — معندناش دليل رسمي لحد دلوقتي.. بس كبري الصورة كدة. كبرت الصورة.. البنت كانت لابسة حظاظة في إيدها مكتوب عليها: "بابا". وقفت ورحت عند الشباك.. بره، الجار كان بيرش الزرع في جنينته.. الدنيا ماشية عادي ومش واقفة على حد، وده كان أغرب شيء! — خمس سنين.. — همست. — إيه؟ — البنت عندها 5 سنين.. كريم كان عنده عيلة وبيتها مفتوح من قبل ما يتجوزني أساساً! أنا مكنتش حتى "الست التانية".. أنا مكنتش أي حاجة.. أنا كنت مجرد ستار وواجهة! في الليلة دي كلمت ماجدة.. مكنتش كلمتها من يوم ما سبت الشقة. — عاوزة أسألك سؤال واحد. — لو عشان الفلوس يا نورهان.. — سوفي لوران. سكوت تاتم. — مين؟ — يا ماجدة! — أنا ما أعرفش حد بالاسم ده.. — عندها بنت عندها 5 سنين! نفس حماتي اتغير.. وده كان كفاية جداً. — انتي كنتي عارفة! — نورهان.. — انتي كنتي عارفة! — مش بالظبط يعني.. — يعني إيه مش بالظبط؟! ماجدة بدأت تعيط.. ولأول مرة من يوم ما عرفتها، عياطها مكنش تمثيل ولا أداةضغط. — كريم غلط.. — بنت عندها 5 سنين اسمها غلطة؟! — ما تتكلميش كدة! — أمال عاوزاني أتكلم إزاي؟! — سوفي أجنبية ومكنتش عاوزة تعيش هنا، وكريم مكنش ينفع يسيب شغله ومستقبله هنا، وأبوه كان تعبان ونفسنا نشوفه متجوز ومستقر.. غمضت عيني: — فدورتوا على "عروسة مناسبة"! — مكنتش كدة والله! — أمال كانت إزاي؟! — قيلنا لما يتجوز بنت حلال ومحترمة هيتعدل وعقله يرجع له ويسيب القرف ده! كنت عاوزة أضحك بأعلى صوتي: — وأنا طلعت "بنت الحلال المناسبة"! ماجدة ما ردتش. — ليه أنا بالذات؟ — كنتي هادية.. وطيبة. الكلمتين دول وجعوني أكتير من أي شتيمة! — مكنش عندك عيلة تعملك مشاكل، باباكي متوفي ومامتك عايشة بعيد، متعلمة ومهذبة وما بتعمليش مشاكل وما بتتكلميش كتيير.. كل صفة كنت فاكراها ميزة فيا، استخدموها كمعيار لاختياري! هما مكنوش بيدوروا على كنة أو زوجة لابنهم.. هما كانوا بيدوروا على واحدة مفيش حيل ليها ولا حد يدافع عنها لو اكتشفت اللعبة! — كريم قالك عن سوفي قبل الجواز؟ — قال إن الموضوع انتهى خلاص. — والبنت؟ — عرفنا بعدها.. — بعد إيه؟ — بعد ما اتجوزتوا خلاص.. — وما قلتوليش! — كنتي عاوزاني أعمل إيه؟! أهد بيتك وأخرب جوازتك؟! اللسان عجز عن الكلام.. وفي الآخر قلت لها: — انتي مكنش ينفع تهدي حاجة هي أساساً عمرها ما اتبنت! قفلت السكة.. وكانت دي آخر مرة أقولها فيها "يا طنط". لما كريم عرف إني خلاص عرفت كل حاجة عن سوفي وبنته، غير الخطة تماماً. بطل يهدد بالأحكام والقضايا.. وبدأ يفاوض. طلب يشوفني في مطعم مقفول وخاص. رحت مع سارة، وهو جه مع المحامي بتاعه. كريم كان شكله تعبان، ولأول مرة أشوف تحت عينيه هالات سودة. — مش لازم نكبر الموضوع ونخليه حرب.. — قال كريم. — موافقة. — رجعي الفلوس وأنا هديكي تعويض مناسب جداً. — كام المناسب ده؟ المحامي بتاعه زق ورقة ناحيتي.. قرأت الرقم: 500 ألف جنيه! تلات سنين من عمري.. بحوالي نص مليون! — كريم أوي.. — قلت بسخرية. كريم جز على سنانه: — الشقة هتفضل متاحة ليكي تقعدي فيها 6 شهور كمان. — شقة أمك؟ — اه. — يااه.. أثرت فيا بصراحة! المحامي اتدخل: — أستاذة نورهان، لازم تاخدي في الاعتبار إن معظم الثروة دي جاية من دخل وأرباح الأستاذ كريم. سارة ابتسمت ابتسامة عريضة: — جميل جداً.. أعتقد كدة الموكل بتاعك مش هيكون عنده أي مانع يقدم للنيابة والمحكمة بيان تفصيلي ومستندات بأصل ومصدر كل مبلغ ودع في الحساب ده! المحامي قفل بقه وما نطقش. سارة كملت: — وكمان هنحتاج المستندات الخاصة بشركاته، وعقاراته اللي بره مصر، والتحويلات اللي اتعملت من الحساب المشترك لشركائه! كريم بصلي بغل: — انتي عاوزة إيه يا نورهان؟! — الحقيقة. — ما تبقيش درامية! — الحقيقة ليها أرقام يا كريم.. وأنا عاوزة الأرقام دي كلها! أمل عليا وقال بصوت واطي: — نورهان.. فكري كويس في اللي بتعمليه.. انتي بقالك 3 سنين ما اشتغلتيش، معندكيش دخل ثابت، والبيت الكبير ده بيحتاج مصاريف كل شهر، ضرائب، صيانة، ومصاريف.. ابتسم ابتسامة خفيفة وقال: — في خلال 6 شهور هتلاقيكي جاية تطلبي مني المساعدة! ده كان كارت الجوكر بتاعه والأخير.. مش إنه بيحبني.. ولا إنه ندمان إنه استغلني.. ولا إننا نصلح اللي اتكسر.. كل الفكرة إنه مراهن إني مش هعرف أعيش وأنجح من غيره! — ممكن.. — ردت عليه. وقفت وقلت: — بس أفشل وأنا لوحدي، ولا إني أكون ناجحة وأنا مرتك الخادمة! الرجوع للشغل في سن اتنين وتلاتين سنة بعد وقفة تلات سنين مكنش سهل خالص.. قبل ما أتجوز كنت شغال في التحليل المالي، وكنت فاكرة إن موضوع التقديم في الشركات هيبقى بسيط.. بس طلع كابوس! في أول انترفيو سألوني عن الفجوة بتاعة التلات سنين.. في التاني، مدير في العشرينات كان بيشرحلي أدوات أنا كنت بستخدمها قبل ما هو يدخل الكلية أساساً! في التالت ما كلمونيش تاني خالص. رجعت البيت، قعدت على أرضية المطبخ وعيطت.. المرة دي مكنش عشان كريم.. كان عشاني أنا! على الأجزاء اللي تنازلت عنها من نفسي ومن غير ما أحس. بعدها فتحت اللابتوب.. حدثت كورساتي، كلمت زمايلي القدام، وأخدت مشاريع أونلاين بسيطة بفلوس قليلة. غلطت.. اتعلمت.. وبدأت تاني. بعد تلات شهور، مسكت شغل في شركة استشارات متوسطة.. المرتب كان أقل من نص اللي كنت باخده زمان.. احتفلت وإني اشتريت 3 زرعات للجنينة! أول ليلة بعد ما قبضت أول مرتب، اتعشيت بره في الجنينة: عيش وجبنة وكوباية شاي.. مكنتش عزومة، بس كانت أطعم أكلة أكلتها في حياتي.. لأن كل حاجة على الترابيزة دي كانت من عرق جبيني أنا! في الوقت ده، حياة كريم المثالية كانت بدأت تنهار.. مش بسببي، بسبب قراراته هو! التفتيش المالي والمراجعة كشفت إن جزء من الفلوس اللي كانت بتدخل حسابنا مكنتش منطبقة مع المرتب المعلن عنه، والشركة فتحت تحقيقات داخلية معاه ومع الموردين. ما عرفتش كل التفاصيل، وسارة نصحتني ما أتدخلش وأكتفي بتقديم الأوراق اللي تطلبها الجهات الرسمية.. وده اللي عملته. كريم اتهمي إني عاوزة أدمر مستقبله شغله.. رديت عليه مرة واحدة بس: — أنا ما ألفتش ولا ورقة يا كريم.. أنا بس بطلت أخبي الورق في الدرج! وبعدها عملتله بلوك. سوفي هي كمان اختفت من حياته.. أو ده اللي كان باين. بعد شهور بعتتلي رسالة.. ما عرفتش جابت رقمي منين، كان مكتوب فيها: "محتاجة أتكلم معاكي.. أنا مش الشخصية اللي انتي فاكراها." كنت هسمح الرسالة، بس سارة قالتلي تقابلي معاها لو حابة، بس انتي مش مجبورة. وافقت.. وتقابلنا في كافيه. سوفي كانت مختلفة تماماً عن الست اللي في الصورة.. تعبانة، خاسة، ومن غير ميك أب. — أكيد بتكرهيني.. — قالت سوفي. — أنا ما أعرفكيش أصلاً عشان أكرهك. ده صدمها.. — كريم قاللي إن جوازه منك كان مجرد شكل وصوري عشان أهله! — دي الحقيقة الوحيدة اللي قالها. — وقاللي إنك عارفة بكده وموافقة! بصيت لها وقلت: — دي بقى كانت كدبة! سوفي نزلت عينيها في الأرض: — لما عرفته كان عندي 27 سنة.. قاللي أهله عمرهم ما هيوافقوا يتجوز أجنبية، وبعدها حملت.. — البنت بنته؟ زقت رأسها: — "إيما".. كريم وعدني إنه هيلاقي حل للموضوع. والحل بتاعه كان.. أنا! — لما شفت صور فرحكم — كملت سوفي — كنت عاوزة أسيبه.. قاللي إن الجواز ده اتعمل عشان يهدّي أهله ويحمي شغله، وأكدلي إنكم عايشين زي الأخوات وما بتناموش في أوضة واحدة. حسيت بسخرية مريرة.. حقيقة تانية استخدمها عشان يبني بيها كدبة أكبر! — والبيت؟ — اشتريناه على أساس إنه سينتقل للعيش معايا بشكل دائم.. — الخمس سنين بتوع أفريقيا؟ سوفي ضحكت ضحكة مكسورة: — عمره ما كان ناوي يقعد 5 سنين هناك! — يعني إيه؟ — المشروع كان مدته 18 شهر بالكتير! حسيت بالقطع بتتركب تاني في دماغي: — أمال ليه قاللي 5 سنين؟! سوفي شربت مية وقالت: — عشان كان ناوي يسيبك بالتدريج.. قاللي بعد ما نعيش بعيد عن بعض كم سنة، الطلاق هيبقى أسهل وأهله هيتقبلوا الموضوع كأنه قدر ونصيب! اتسمرت في مكاني.. — والفلوس؟ وشها اتغير: — ده السؤال اللي كنت جاية أسألهولك أنا.. — فلوس إيه؟ — كريم قاللي إنه لما يخلص المهمة دي، هيكون معاه سيولة وثروة كافية يستقر معايا للأبد. — كام؟ — حوالي تمانية مليون جنيه.. جسمي كله اتشد! الخطة كانت بسيطة وسلسة: يتجوزني.. يحافظ على الشكل القدام الناس.. يستخدم الحساب المشترك كخزنة.. يبعتني 5 سنين أستنى كزوجة مطيعة.. وبعدها ياخد الفلوس ويخلع! أنا مكنتش الشخص اللي دمر الخطة.. أنا بس سبقت وأخدت خطوتي الأول! الطلاق أخد حوالي سنة كاملة.. مكنش فيه مشاهد درامية ولا قاضي بيخبط بالمطرقة ولا اعترافات سينمائية.. مجرد شهور من أوراق ومحاميين وأدلة ومكالمات تفرس. البيت اللي اشتريته كان من أكتير الحاجات اللي حصل عليها نزاع.. وفي الآخر، تم إعادة تقييم الممتلكات كلها. جزء من الفلوس أُعيد للحساب عشان يتقسم بالشكل القانوني، وجزء تاني اتجمد بسبب التحقيقات المالية مع كريم. أنا ما احتفظتش بالتمانية مليون كلهم.. وده عمره ما كان هدفي اساساً. اللي احتفظت بيه كان حاجة أغلى بكتير: إن كريم ما يبقاش هو الوحيد اللي بيقرر مين ياخد إيه من حياتنا! يوم ما مضينا الاتفاق النهائي، كان قاعد قدامي.. خاسس جداً، شغله اتعطل بسبب التحقيقات، أهله تقريباً مابيتكلموش معاه، وسوفي أخدت بنتها ورجعت بلادها تعيش جنب أهلها. كريم كان ماسك القلم وقاللي: — مبسطوطة دلوقتي؟ فكرت ثواني وقلت: — لا. استغرب وقال: — أمال عملتي كل ده ليه؟! — عشان أقدر أبص لنفسي في المراية وأنا تحترمها. مضيت العقد.. وهو ما نطقش. وقفت عشان أمشي، وسمعت صوته: — أنا عمره ما كان قصدي أؤذيكي يا نورهان.. لفيت له وقلت: — هي دي كانت مشكلتك طول عمرك يا كريم. عقد حواجبه: — قصيدك إيه؟ — إنك مكنتش بتفكر فيا أصلاً لدرجة إنك تعوز تؤذيني أو ما تؤذنيش.. أنا مكنتش موجودة في حساباتك من الأساس! ما عرفش يرد.. ولأول مرة، ما استنيتش أسمع رده.. وخرجت. بعد سنتين.. جنينتيقتقت بتبقى حاجة ثانية! زرعت لافندر عند السور، ورد بلدي عند المدخل، وطماطم في صندوقين خشب، وشجرة ليمون صغيرة في أكتير حتة بتدخلها الشمس. مش كل الزرع عاش.. فيه حاجات نشفت وحاجات طلعت معوجة. اتعلمت إن الجنينة مش مجرد إنك تمتلك حاجة حلوة.. الجنينة يعني تهتم بيها وترعاها حتى وانت مش عارف هتورد ولا لأ. يمكن عشان كدة كنت بحبها أوي. في يوم بالليل جالي اتصال من رقم غريب.. رديت: — نورهان؟ عرفت الصوت.. ماجدة. مكنتش كلمتها من سنتين تقريباً. — أهلاً يا طنط. — أنا في المدينة وكنت.. ما رديتش. — كنت حابة أشوفك.. — ليه؟ — معايا حاجة تخصك. وافقت أقابلها في كافيه قريب. كانت كبرت في السن أوي.. أو يمكن أنا اللي عمرها ما شفتها على حقيقتها. طلعت من شنطتها علبة صغيرة.. جواها كان الأنسيال اللي كنت لابساه يوم فرحي، كنت سبته في الشقة وأنا ماشية. — قلت يمكن تكوني عاوزاه.. بصيت له وقلت: —خليه معاكي.. مش عاوزاه. ماجدة ضغطت على شفايفها وقالت: — كريم مابقاش عايش معانا.. ما سألتش هو عايش فين. — شغال في شركة صغيرة دلوقتي.. وتقريباً مابيشوفش البنت إيما. فضلت ساكتة. — ساعات بفكر وبقول كان زمان كل حاجة مختلفة لو... وسكتت. — لو إيه؟ عينيها دمعت وقالت: — لو كنت قلتلك الحقيقة من الأول.. بصيت لها ثواني وقلت: — اه.. كان زمان كل حاجة مختلفة فعلاً. ماجدة كانت مستنية يمكن أواسيها أو أقولها مفيش حاجة.. بس ما عملتش كدة. — هل ممكن تسامحيني؟ — سألتني. فكرت في العشاء بتاع رأس السنة.. في أسئلتها عن الإنجاب والدكاترة.. في الليالي اللي قضيتها فاكرة إن جوزي ما بيرغبش فيا عشان أنا فيا عيب أو مش كفاية.. في الصورة.. في التمانية مليون.. وفي الست اللي كان عندها 32 سنة واضطرت تتعلم من الأول إزاي تعيش وتعتمد على نفسها. — ما أعرفش يا طنط.. ماجدة نزلت رأسها وقالت: — على الأقل انتي صريحة.. — اتعلمت متأخر. وقفت عشان أمشي، فشاورت على العلبة: — متأكدة إنك مش عاوزة الأنسيال؟ بصيت له للمرة الأخيرة وقلت: — متأكدة. وخرجت. في الليلة دي وأنا برشي الزرع في الجنينة، فكرت في قد إيه الدنيا غريبة.. طول عمر كنت فاكرة إن أوحش يوم في حياتي هيكون اليوم اللي أكتشف فيه إن جوزي بيحب واحدة تانية. طلعت غلطانة.. أوحش يوم كان اليوم اللي اكتشفت فيه إني أنا نفسي بطلت أحب نفسي واحترمها! وطلعت غلطانة كمان في أحسن يوم.. مكنش اليوم اللي اشتريت فيه البيت، ولا اليوم اللي طلقت فيه، ولا اليوم اللي اشتغلت فيه.. كان صباح يوم في الربيع.. كانت مطرت طول الليل، خرجت الجنينة بكوباية الشاي، وشفت شجرة الليمون اللي كنت فاكراها ماتت طلعت برعم أخضر صغير أوي! وطيت ولمسته بصابعي.. كان صغير وضعيف.. بس حي! قعدت على السلم وبدأت أعياط.. مش زعل. فكرت في الست اللي كنتها زمان: اللي كانت بتلبس قميص نوم جديد ومستنية نظرة من جوزها.. اللي كانت بتتعلم أكلات ما بتحبهاش عشان تعجبه.. اللي كانت فاكرة إنها لازم تبقى أرفع، أذكى، أهدى، وأصبر عشان تستاهل تتحب! لو أقدر أرجع بالزمن للست دي، مش هقولها إن كريم ما بيحبكيش.. هي كدة كدة كانت هتعرف. كنت هقولها حاجة أهم بكتير: انتي مش محتاجة تثبتي لأي حد إنك تستاهلي يختارك.. انتي كفاية زي ما انتي! التليفون رن.. كانت سارة. — جاية الليلة دي ولا إيه؟ كنا متفقين نتعشى مع شوية أصحاب. بصيت لبنطلوني اللي متبهدل طين وزرع وقلت: — اديني نص ساعة. — انتي دايماً بتقولي نص ساعة وبتيجي بعد ساعة! — خلاص ابدأوا من غيري. قفلت التليفون. قبل ما أدخل البيت، بصيت حواليا.. جنينتي مكنتش شبه الجناين اللي في المجلاات: فيها فروع معوجة، قوارير زرع قديمة، وخراطيم ملفوفة بأي طريقة.. بس كانت بتاعتي أنا! مش لأن اسمي مكتوب في العقد.. لا، لأن أنا اللي بنيت حياة حقيقية فيها! لمدة تلات سنين، كنت فاكرة إن التمانية مليون جنيه هما أماني الوحيد.. بعدها فهمت إن الفلوس ادتني وقت بس.. بس الخروج الحقيقي بدأ من اليوم اللي بطلت أسأل فيه نفسي: "هعمل إيه لو كريم سابني؟" وبدأت أسأل نفسي: "أنا ممكن أكون إيه وأوصل لإيه لو أنا اللي مشيت وسيبته؟" بعد خمس سنين من يوم المطار ده، أنا وكريم ما شفناش بعض تاني. حياته مشيت في طريقها.. وحياتي مشيت في طريقها. من فترة للتانية، حد يعرف القصة يسألني: هو انتي ندمانة إنك حولتي الفلوس كلها في اليوم اللي ركب فيه الطيارة؟ بفكر دايماً ثانية قبل ما أرد.. مش عشان شاكة، بس لأن الإجابة الحقيقية مالهاش دعوة بالتمانية مليون جنيه. أنا في اليوم ده مكنتش بنقل فلوس من حساب لحساب.. أنا كنت بحرك أول قطعة في حياة فضلت وافقة وممتنعة عن الحركة لمدة تلات سنين! ولأول مرة من يوم فرحي.. الشخص اللي بيقرر حياتي رايحة فين.. كان أنا! النهاية خاص لصفحة روايات وحكايات محمد نور و وردة احمد

مقالات ذات صلة

سواق التاكسي الي ولد بنت مليونيره وسط المقابر

طـ،ـلاق غيـ،ـابي كاااامله بقلم أماني سيد

لماذا أحالت نقابة الأطباء

سر المولد ٢- زهرة الربيع

حنان ترك في برنامج انا والعسل مع نيشان حكت قصه حياتها كامله

و.فاة شقيق نهال عنبر في أمريكا.. وطلب عـ،ـاجل من الفنانة للجمهور

اترك تعليقاً إلغاء الرد