طردوني من شغلي- محمد نور

طلعت الدور التاني لأخر مرة عشان أودع ريناد.

أوضتها كانت فاضية.

— هي فين؟

الدادة القديمة، عمة دشرية، ظهرت ورايا.

كانت عينيها حمرا من العياط.

— سليم بيه طلب من الهانم مرڤت تاخدها النادي وما ترجعش بيها غير على بالليل.

حسيت بحاجة اتكسرت جوايا.

حتى ما سابنيش أودعها.

طبقت البطانية الزرقا الصغيرة اللي ريناد بتسيبها دايماً على سريري وحطيتها في مكانها.

وبعدها خرجت من البيت ده ومن غير ما ألتفت ورايا.

قضيت التلات أيام اللي بعدهم في شقة أختي سمر، بفرك وبمثل إني كويسة.

بعت سي فيهات.

ظبطت أوراقي.

حتى رحت انترفيوين.

بس كل ما كنت بشوف رسمة طفل أو أسمع ضحكة بنت صغيرة في الشارع، افتكر ريناد.

في الليلة الرابعة، الساعة 2:17 بعد نص الليل، تليفوني رن.

كانت عمة دشرية.

— الحقيني يا دنيا، تعالي بسرعة على مستشفى دار الفؤاد.

اتعدلت في سريعي فجأة:

— فيه إيه؟ إيه اللي حصل؟

سمعت صوت نفسها الطالع نازل بالعافية:

— ريناد سخنة مولعة وتعبانة أوي.

— وسليم بيه فين؟

— هنا.

سكتت ثانية وقالت:

— وعمالة تطلبك وبتبكي عليكِ.

لبست في أقل من 3 دقايق.

أول ما وصلت المستشفى، شفت سليم واقف قدام أوضة الأطفال.

كان لابس نفس القميص بتاع إمبارح، متجعد ومثني أكمامه.

كان باين عليه إنه كبر 10 سنين في كام يوم.

أول ما شافني، قرب مني وقال:

— شكراً إنك جيتي.

ما رديتش.

ودخلت فوراً.

ريناد كانت نايمة والكانويلا في إيدها.

خدودها كانت حمرا ومخبية وشها في الأرنب القماش اللي كنت اشتريتهولها في عيد ميلادها الرابع.

أول ما شافتني، قعدت تعيط:

— دنيـا!

جريت عليها:

— أنا هنا يا روح قلب دنيا.

اتعلقت في رقبتي:

— افتكرتك مش بتحبيني خلاص وماشية.

حسيت بسكينة اتقطعت في قلبي.

— إياكي تفكري كده أبداً.

— طب ليه سبتيني ومشيتي؟

بصيت من فوق راسها.

سليم كان واقف على الباب.

وطى عينه في الأرض وقال:

— الكبار ساعات بياخدوا قرارات غلط يا حبيبتي.

ريناد مسكت وشي بإيديها الصغيرين:

— بابي هو اللي طردك.

محدش نطق كلمة.

البنت بصت لسليم:

— صح يا بابي؟

بلع ريقه بالعافية:

— أيوه يا بنتي.

— شاهيناز هي اللي قالتلك تعمل كده.

سليم رفع رأسه بسرعة:

— قلتي إيه؟

ريناد كشرت وشها:

— هي قالت إن دنيا مضايقاها وواقفة في طريقها.

السكوت ملا المكان وكان تقيل أوي.

طبطبت على شعر البنت:

— ريناد يا حبيبتي، بلاش نتكلم في الكلام ده دلوقتي.