طردوني من شغلي- محمد نور
— عندك حق.
— ولو ده اتغير في يوم، أنا هسيب الشغل الأول قبل أي خطوة.
هز رأسه:
— اتطبقنا.
على مدار 7 شهور، سليم نفذ وعده حرفياً.. مفيش هدايا غالية، مفيش محاولات للتقرب، مفيش كلام يلمح بحاجة.. كان فيه أفعال بس.
بدأ يقضي وقت أكتر مع ريناد، يرجع البيت قبل الساعة 8، يبطل يرد على تليفونات الشغل في العشا.. اتعلم إزاي يعمل شعر بنته غزل بنات حتى لو كانت بتطلع منكوشة في الأول!
كان بيحضر حفلات المدرسة، ومواعيد الدكاترة.. وببطء، اختفى الرجل الجاف اللي طردني زمان، وظهر الأب اللي بيحاول يتغير عشان بنته.
لما ريناد تمت 5 سنين، قدمت استقالتي.
سليم قرا الجواب في سكوت:
— لقيتي شغل تاني؟
— أيوه، جالي عرض إداري لتنسيق مركز أطفال في المعادي.
وشه نطق بالفرحة:
— ده خبر ممتاز!
ابتسم وما حاولش يوقفني ولا يسأل إيه هيحصل بيننا.. بس قال:
— أنا فخور بيكي جداً.
في أخر يوم ليا، ريناد عيطت.. وأنا كمان عيطت. بس المرة دي الوداع كان مختلف.. أنا مش بختفي من حياتها، أنا بس بغير مكاني.
بعد شهر، سليم كلمني:
— دنيا..
— نعم يا سليم بيه؟
— أنتِ خلاص مش شغالة عندي صح؟
ابتسمت:
— أظن كده برضه.
— تمام.. يبقى حابب أعزمك على العشا.
— عشان ريناد؟
— لا..
سكت ثانية وكمل:
— عشاني أنا.
بصيت لجواب الاستقالة اللي لسه شايلاه في درج مكتبي، وافتكرت اليوم اللي خرجت فيه من بيته بشيل شنطتي ومقتنعة إني خسرت كل حاجة.. وافتكرت كل الحاجات اللي كان لازم تتكسر عشان كل واحد فينا يلاقي مكانه الصح.
— يوم الجمعة.
سليم أخد ثانية عشان يستوعب:
— يعني دي موافقة؟
— دي فرصة.. وحضرتك اللي تقرر هتستغلها إزاي.
سمعت ضحكته الصافية لأول مرة من غير ذنب ولا حمل على قلبه:
— مش هضيعها من إيدي أبداً.
بعد سنة.. ريناد لسه شايالة الرسمة إياها بتاعة الـ 3 أشخاص.. بس غيرت حاجة واحدة بس فيها:
تحت اسمي ما بقتش كاتبة “الدادة دنيا”.. بقيت كاتبة “طنط دنيا”.
عشان بالنسبة لها، محدش محتاج مسمى وظيفي عشان يكون جزء من العيلة.
وكل ما بشوف الورقة دي بفتكر الدرس اللي أخد مني شهور عشان أفهمه:
فيه ناس بتبعدك عن حياتها عشان خايفة من المكانة اللي أنت بتاخدها عندهم.. وفيه ناس عاوزاك قريب لمصلحتها..
بس الناس اللي بتحبك بجد بتعمل أصعب حاجة: بتتعلم تحترمك وتقدرك، حتى وهي عارفة إنها ممكن تخسرك.
- النهاية
- خاص لصفحة روايات وحكايات محمد نور و وردة احمد
