الزوجة اختفت – محمد نور

الزوجة اللي اختفت بعد ما بلعت أربع حبات — "يا أستاذ يونس... أنت بجد سبت مدامك تبلع الأربع حبات مرة واحدة؟" "يونس" حتى مرفعش عينيه من على المكتب. كان ماسك سيجارة مش مطفية بين صوابعه وابتسم ببرود واستهتار: — "نور طول عمرها هبلة وبتصدق أي حاجة.. قولت لها دي فيتامينات كالسيوم، بلعتهم من غير ما تسأل حتى." عم "محسن"، السكرتير، وشه اتخطف وبقى زي اللوحة البيضا.. والملف اللي كان في إيده وقع على الأرض: — "يا يونس بيه! دي مش حبوب الهرمونات اللي المدام بتمشي عليها!" الابتسامة اتمحت من وش يونس في ثانية: — "انت بتقول إيه؟" — "العلبة دي من العينات التجريبية اللي الأنسة فريدة جابتها الشهر اللي فات! أربع كبسولات منها مرة واحدة ممكن يعملوا توقف في أجهزة الجسم وتسمم!" السيجارة وقعت من صوابعه. وبعد ثانية واحدة، كان يونس طالع على السلم بيجري زي المجنون. خبط باب أوضة النوم وفتحه على آخره. فاضية. السرير كان متسوي بطريقة مرعبة من كتر الترتيب. وعلى الكومودينو مفيش غير علبة بيضا فاضية من غير أي تكت.. فاضية تماماً. وجنبها ورقة صغيرة. مسك يونس الورقة وإيده بتترعش. كان مكتوب فيها كلمة واحدة: "يا يونس.. انت كسبت." ولأول مرة من سنين طويلة، إيد يونس تترعش بالشكل ده. — "افتحوا كاميرات المراقبة بسرعة!" قبل التوقيت ده بتلت ساعات، "نور" كانت طالعة من بوابة الفيلا، لابسة نفس هدومها البسيطة بتاعة كل يوم، وماسكة في إيدها شنطة قماش صغيرة. مبصتش وراها ولا بصة.. ولا حتى مرة واحدة. — "اتصلوا بيها!" التليفون مقفول. — "المستشفيات.. العيادات.. الطوارئ! قلّبوا عليها البلد كلها مش عايز شبر يفوتكم!" مفيش أي حالة دخول باسم "نور" في أي مستشفى. ولا حجز قطر.. ولا تذاكر طيران.. ولا حتى استخدام لبطاقتها الشخصية. اختفت.. كأن الأرض انشقت وبلعتها. ساعتها بس يونس افتكر الصبحية دي.. لما نور دخلت عليه المكتب والعلبة البيضا في إيدها: — "إيه ده يا يونس؟" من غير ما يشيل عينيه من على شاشة الكمبيوتر رد بجفاء: — "كالسيوم." هزت رأسها بسكات.. وبعدها فضّت أربع كبسولات في كف إيدها وبلعتهم قدامه. من غير ما تشك.. من غير ما تسأل.. عشان على مدار تلت سنين، كانت بتصدق كل كلمة تخرج من بوقه. تلت سنين جواز غصب عنه بسبب وصية جده الله يرحمه. تلت سنين كان يونس بيوريها فيهم العين الحمرا ومبين لها إنه بيحب واحدة تانية: "فريدة". نور بالنسباله كانت مجرد الصورة الاجتماعية اللي محتاجها عشان ياخد ورثه. مجرد خيال مآتة ساكت في الفيلا الكبيرة دي. لما أمه كانت بتهينها وتقسَى عليها، كانت نور بترد بمنتهى الهدوء: — "حاضر يا هانم." ولما فريدة كانت بتيجي عن قصد عشان تفكرها مين اللي شاغلة قلب جوزها، كانت نور بتنسحب في صمت. عمرها ما صرخت.. عمرها ما اتشرطت.. ولا عمرها عيطت قدامه. ويونس فسر السكوت ده على إنه هبل وقلة حيلة. الساعة تلاتة الفجر، وتحت مطر نازل زي السيل، جيلو مسج من رقم غريب: "مفيش داعي عيلة الهواري تشيل هم جنازة نور." جنازة؟ فضل يونس باصص للكلمة لحد ما حس بحاجة بتتكسر وبتقع جوة صدره. ده مش وجع.. قعد يقنع نفسه إنه مستحيل يكون وجع.. هو عمره ما حبها اصلاً! كل القصة إنه... عمره ما تمنى لها الموت. تاني يوم الصبح، فريدة جت الفيلا ومعاها شنطة هدومها: — "يونس حبيبي، أنا جيت.. هي الست دي كركيبها اتشالت من هنا؟ مش عايزة ألمس أي حاجة كانت بتستعملها." كان قاعد في الصالون ومسك علبة الدوا الفاضية بين إيديه: — "يمكن تكون ماتت." فريدة اتسمرت مكانها: — "إيه؟" — "خدت أربع كبسولات من العلبة اللي انتِ بعتيها." في جزء من الثانية، وش فريدة اللي كان دايماً مظبوط ومرسوم، هرب منه الدم وبقى أصفر زي الليمونة: — "أنا... أنا افتكرتها مكملات غذائية عادي!" رفع يونس عينيه فيها: — "المساعد بتاعك اعترف.. انتِ اللي أمرتيه يغير العلبة ويشيل التكت من عليها." نزلت فريدة على ركبتها قدامه وهي بتترجاه: — "صدقني يا يونس! حتى لو كان بيننا مشاكل، عمرِي ما كنت..." — "اطلعي برة." — "أنت بتطردني عشانها؟" — "يا عم محسن!" السكرتير ظهر في ثواني: — "وصل الأنسة فريدة لحد الباب." بعد تلت أيام، الشرطة وصلت لآخر خيط عن "نور". كاميرا مراقبة لقطتها وهي داخلة حارة مقطوعة في جنوب البلد. وفِي آخر الحارة دي، كان فيه ترعة كبيرة. فرق الغطس نزلت المية تلت مرات.. وملقوش أي جثة. بس بعدها، حصلت حاجة أغرب بكثير! اختفاء الست اللي كان يونس فاكرها مجرد "ست بيت" ملهاش في التور والطبخ، هز شركة "الهواري للأدوية" هزت العمر! في أقل من 48 ساعة، أكبر الموردين فسخوا عقودهم مع الشركة. وسهم الشركة نزل 8% في البورصة. عم محسن وضح له وهو خايف: — "يا يونس بيه.. الموردين قايلين إنهم مبيعتمدوش غير العقود اللي المدام هي اللي كانت ممشياها ومظبطاها بنفسها." بص له يونس بذهول: — "عقود إيه؟" السكرتير أخد نفس وقال بعد تردد: — "من سنتين حضرتك كلفتا بشغل شبكة الموردين بتوع أدوية الصعيد وسينا.. الشغلانة اللي مكنش حد راضي يمسكها." يونس كان ناسي الموضوع تماماً! ساعتها رماها عليها عشان ميكنش ليها لازمة في البيت ويرتاح من وشها.. شغل مرمطة وتعب ومقاطعة وسفر بالشهور. كان قصده يبعدها عنه وخلاص. ونور وقتها وافقت.. وعمرها ما اشتكت ولا فتحت بوقها. حط عم محسن عقد على المكتب قدامه: — "هي اللي كشفت وصيغت العقد ده بنفسها." بدأ يونس يقرأ.. وبعد كم دقيقة، أنفاسه بدأت تتقطع. كل بند ومادة في العقد مكتوبة بدقة مرعبة! المخاطر، الغرامات، حقوق الملكية الفكرية، بنود التحكيم... دي مش بنود كاتباها بنت يا دوب معاها ثانوية عامة! — "هي مين نور دي أصلاً؟!" وقبل ما محسن يرد، تليفون المكتب رن. موظف الاستقبال قال بصوت متوتر: — "يونس بيه.. فيه واحد برة مصمم يدخل لحضرتك حالا." — "مين ده؟" سكت الموظف ثواني وبعدين قال: — "المحامي الخاص بتاع جدك الله يرحمه." قام يونس من طوله ببطء. دخل الراجل وهو ماسك شنطة جلد سودا، وحط على المكتب ظرف مقفول بختم من أربع سنين. على ظهر الظرف كان فيه جملة واحدة بخط إيد كبير العيلة، "الحاج الهواري": (لا يُسلّم ليونس إلا بعد ما نور تسيب العيلة دي وتمشي بلا رجعة) بص المحامي في عين يونس بثبات وقال: — "يونس بيه... أظن جه الوقت اللي تعرف فيه ليه جدك أجبرك تتجوزها." الجزء الثاني والأخير المحامي مقعدش.. فضل واقف قدام المكتب ويونس بيكسر ختم الظرف. جوة الظرف كان فيه تلات أوراق: صورة قديمة.. شهادة تخرج جامعية.. وجواب مكتوب بخط إيد جده الله يرحمه. مسك يونس الصورة الأول.. كان فيها جده، وهو أصغر بكتير في السن، واقف جنب راجل شكله بسيط ماسك إيد بنوتة صغيرة عندها يجي عشر سنين. البنت دي كانت "نور". قلب يونس الصورة.. كان مكتوب على ظهرها تاريخ وجملة واحدة: (عيلة "مراد" أنقذت عيلة الهواري مرتين) — "فهمني يعني إيه الكلام ده؟" اتنهد المحامي بعمق وقال: — "أبو المدام نور مكنش راجل جاهل وزي ما متسجل في الورق.. الراجل ده كان يدوب ممشي حاله بس كان مدير معمل أبحاث أدوية صغير. مكنش معاه فلوس ولا معارف، بس كان مسجل براءات اختراع كتير في طرق استخلاص المواد الفعالة من الأعشاب.. وبراءة اختراع واحدة منهم هي اللي أنقذت شركات 'الهواري للأدوية' من الإفلاس المحقق من عشرين سنة." — "جدي اشترى منه الاختراع ده؟" — "لا.. تنازل عنه بلاش." بص له المحامي بثبات وكمل: — "عشان أبو نور والحاج الهواري كانوا أصحاب عمر.. عيلتكم كانت هتقفل وتفلس، وأبو نور تنازل عن حقوقه من غير ما يطلب حتى نسبة في الأسهم! وبعدها بسنين، حصل حريق في معمل الأستاذ مراد.. وأبو نور وأمها ماتوا في الحريق، والبنت الوحيدة هي اللي عاشت. الحاج الهواري لقاها في مستشفى عام بعد الحادثة بيومين.. وكان حاطط إيده في إيد صاحب عمره وهو بيموت ووعده إنه هيربيها ويحميها. بس البنت اختفت من دار الرعاية.. مرت على بيوت كتير لحد ما استقرت في ملجأ." — "يعني جدي كان عارف مكانها؟" — "فضل يدور عليها سنين.. لحد ما لقاها." شار المحامي على الورقة التانية.. فتحها يونس بذهول. بيانات أكاديمية.. جامعة القاهرة.. كليتين في نفس الوقت: حقوق وعلوم كيمياء حيوية! تقدير امتياز مع مرتبة الشرف.. الاسم: نور مراد. اتسمر يونس مكانه: — "ده مستحيل!" — "لا مش مستحيل.. نور خلصت ثانوية عامة وهي عندها 16 سنة، وأخدت منحة دراسية باسم مختلف لتأمينها.. ودرست التخصصين مع بعض، وبعدها اشتغلت في مكتب محاماة كبير متخصص في ملكية أدوية الأبحاث." — "ولما هي كده.. ليه الـ CV بتاعها كان مكتوب فيه إنها اشتغلت كاشير وويتر وسكرتيرة؟!" — "عشان اشتغلت الشغلانات دي فعلاً عشان تصرف على نفسها وهي بتدرس.. ولما رجعت، قررت تخبي شهادتها وأصلها." — "ليه؟!" بص المحامي للجواب اللي في إيد يونس ولسة مفتحهوش: — "السؤال ده تجاوبك عليه هي بنفسها." الجملة دي خلت قلب يونس يقف ثانية: — "هي؟!" رد المحامي ببرود: — "لو لسة عايشة يعني." فتح يونس الجواب.. خط جده كان مالي الصفحات. مكنتش وصية.. كانت "اعتراف". الحاج الهواري بيعترف إنه حول دَيْن أخلاقي لجوازة وغصب.. كان فاكر إنه لما يجمعهم، هيقدر يحمي نور ويرد جميّل أبوها. بس اكتشف إنه اتسرع وغلط. عشان نور مأفقتش تتجوز يونس عشان فلوسه ولا عشان عيلة الهواري.. أبوها كان سايب بحث مكملوش.. تركيبة معينة من أعشاب طبيعية، وشركات الهواري أخدت جزء منها ودمجتها في أبحاثها من غير ما تعرف. نور كانت عايزة تدخل على الأرشيف القديم للشركة عشان تكمل شغل أبوها وتطلّع حقه للنور. والجواز كان بيديها الصلاحية القانونية لدخول الأرشيف. بس كان فيه شرط.. جده كتب في الجواب: (هي طلبت مني تلت سنين بس.. وقالت لي بعد التلت سنين ما يخلصوا، همشي ومش هاخد معايا قشة واحدة تخص عيلة الهواري). رفع يونس راسه بسرعة: — "تلت سنين..." ذكرى جوازهم التالتة كانت من أسبوع فات بس! كل حاجة وضحت وتجمعت زي المكعبات.. سكوتها.. عدم طلباتها.. سفرياتها للصعيد وسينا.. الساعات الطويلة اللي كانت بتقضيها تحت في الأرشيف والمراجعة. نور عمرها ما حاولت تكون "مدام يونس الهواري".. نور كانت شغالّة، بتدور على حق أبوها وبتجهز لليوم اللي هتمشي فيه من غير ما تلتفت! وهو.. كان فاكرها عبيطة وبتموت فيه! — "وفيه حاجة كمان.." أخد المحامي فلاشة صغيرة وحطها قدامه: — "الحاج طلب مني أسلمك دي مع الجواب." فتحوا الفلاشة على الكمبيوتر.. كان عليها مئات التقارير، الإيميلات، والعقود.. وفولدر كامل باسم: (مشروع القشّاش). عم محسن السكرتير بدأ يقلب في الملفات بسرعة وهو مش مصدق: — "يا يونس بيه.. الهانم في السنتين اللي فاتوا بنَت شبكة الموردين دي من الصفر! مش بس كده.. دي استخدمت الشبكة عشان توصل لنبتة نادرة كانت في بحث أبوها، واستخلصت منها مادة فعالة الشركة بقالها 8 سنين بتحاول توصلها ومش عارفة!" — "دي... دي تسوى مليارات!" بص يونس على آخر سطر في التقرير: (المسؤول عن المشروع: نور مراد.. وجميع حقوق براءة الاختراع ملكية خاصة خارج أصول شركة الهواري). المحامي كمل: — "مدام نور معملتش تحليل واحد ولا جولة واحدة بفلوس الشركة.. كل قرش صرفته كان من أرباح براءات اختراع أبوها اللي رجعتها بالقانون قبل ما تتجوزك." مرارة سودا ملت قلب يونس.. طوال تلت سنين كان بيسيب أمه تقول عليها "جايعانة ولمامة ومأوى".. وهو كان فاكرها عايشة على قفاه! في حين إنها كانت تقدر تمسح بيهم الأرض من أول يوم! في الليلة دي، دخل يونس أوضة نور.. فتح الدواليب لأول مرة. فاضية تقريباً.. تلات فساتين، بلوفرين، وكم كتاب. مفيش مجوهرات.. ولا شنطة ماركة.. ولا حتى لمست الكارت المفتوح اللي كتبه باسمها لما اتجوزوا. دخل عم محسن: — "يونس بيه.. سحبنا حركة الكارت بتاع حضرتك.. تلت سنين مفيش عملية شراء واحدة!" غمض يونس عينيه.. وافتكر أول شتا ليهم سوا.. لما شافها بترقع كم البالطو بتاعها، وقالها بقرف: "لو محتاجة زفت فلوس خدي من الخزنة متفضحيناش!" رفعت راسها وقالت له بهدوء: "لسة شغال وينفع يتقفل." ساعتها افتكرها بتستعطفه.. ودلوقتي بس فهم إنها مكنتش عايزة تبقى مديونة له بقيمة خيط! الشرطة كملت تفريغ الكاميرات.. وجابوا لقطة من كاميرا خاصة لمغسلة في الحارة اللي اختفت فيها نور. ظهر في الفيديو عربية إسعاف خاصة دخلت الحارة، ونزل منها اتنين شالوا حد على نقالة وطلعوا بيه.. البالطو كان نفس بالطو نور! تتبعوا العربية.. طلعت تابعة لمؤسسة طبيب اسمه "دكتور شريف".. طبيب كان صديق لعيلة نور وززميل أبوها القديم. سافر يونس بنفسه أصل البلد عشان يوصل للمستشفى الخاص بتاعه. دخل يونس لل دكتور شريف وهو هيتجنن: — "نور فين؟!" رد الدكتور ببرود وقسوة: — "وهي تفرق معاك في إيه؟" جز يونس على سنانه: — "أنطق هي فين?!" — "لما بلعت الكبسولات، كان فاضل فيها الروح إنها تتصل بيا.. عارف أول كلمة قالتها لي إيه؟ ..قالت لي: 'يا دكتور شريف، أوعى تقول ليونس'." الكلمة نزلت على يونس زي القلم: — "لحقناها في آخر ثانية.. عملنا لها غسيل معدة وكانت داخلة على فشل كبدي حاد، قعدت 48 ساعة في العناية المركزة بين الحياة والموت." يونس أنفاسه اتقطعت وسند على الكرسي: — "يعني... هي عايشة؟" — "أيوة عايشة." — "عايز أشوفها!" — "هي مش عايزة تشوفك." — "أنا محتاج أكلمها!" — "كنت كلمتها من تلت سنين!" كمل الدكتور شريف: — "عارف هي ليه اختفت من غير ما تستعمل بطاقتها؟.. عشان كانت مستنية اللي عمل اللعبة يظهر." فريدة وقعت في الشر أعمالها.. كانت فاكرة نور بتموت ومش هتلحق تفهم. بس نور عارفة تركيبات الأدوية كويس.. لما بلعت وحست بأعراض غريبة، شمّت ريحة المادة الفعالة واكتشفت إنها مادة تجريبية. قبل ما تمشي، شغلت برنامج تسجيل وتتبع على تليفونها.. وفي نفس الليلة، فيه حد دخل على أرشيف الشركة ومسح كل الملفات الخاصة بالعلبة التجريبية.. الحد ده كان المساعد بتاع فريدة، والـ IP كان من شقة فريدة شخصياً! الشرطة قبضت على فريدة بتهمة الشروع في قتل والتزوير والإضرار العمدي. ولما يونس راح لها التخشيبة، صرخت فيه: — "أنا عملت كده عشاننا! تلت سنين مستنياك تطلقها وكل مرة تحجج بجدك والورث!" رد يونس بنظرة ميتة: — "ده ميعطكيش الحق تؤذيها." ضحكت فريدة بمرارة: — "أنا؟ انت كنت بتهينها أكتر مني! كنت بتطنشها، وسايب أمك تذلها، وكدبت عليها في الدوا وقلت لها كالسيوم! جاي دلوقتي تعمل فيها الشريف وتلبسني كل حاجة؟!" يونس ملقاش كلام يترد بيه.. عشان هي كانت صح! فريدة نصبت الفخ، بس هو اللي شد الزناد بكدبته! بعد يومين.. سمح الدكتور شريف ليونس يدخل لنور. كانت قاعدة جنب الشباك.. خاسة شوية.. ووشها أصفر، بس عايشة. ماسكة تقرير وبتقرأه بمنتهى الهدوء. وقف يونس على بعد خطوات.. تلت سنين عايش معاها في بيت واحد، وعمره ما حس إنه غريب عنها زي اللحظة دي. — "نور.." رفعت عينها.. مكنش فيه في عينها أي مشاعر.. لا كره ولا غضب ولا مفاجأة. وده كان أصعب بكثير من الشتيمة! — "أستاذ يونس." مقالتقش "يونس".. قالت "أستاذ يونس"! — "قالولي إنك بقيتي أحسن." — "الحمد لله." — "أنا... أنا آسف يا نور." قفلت التقرير وبصت له: — "على إيه؟" — "على كل حاجة.. على الكبسولات.. على التلت سنين.. على معاملة أهلي..." ردت بنبرة هادية جداً: — "الكبسولات كانت حادثة." — "لا.. كدبتي مكنتش حادثة." سكتت نور ثواني وبعدين قالت: — "صح.. انت طول عمرك شايفني أهبل من إني أسألك، فلما سألتك وقالت لي كالسيوم، بلعت وأنا مغمضة." بلع يونس ريقه بالعافية: — "ليه صدقتيني؟" ابتسمت نور ابتسامة مكسورة: — "عشان كنت جوزي.. مكنتش مستنية منك تحبني، بس كنت فاكرة إنك على الأقل مش هتؤذيني عن قصد. وعموماً... أنا غلطت." طلعت ورقة من ملف جنبها: — "دي ورقة الطلاق.. أنا مضيتها من قبل ما أبلع العلبة." مسك يونس الورقة وإيده بتترعش: — "كنتي ماشية كده كده؟" — "طول عمري كنت همشي لما التلت سنين يخلصوا." — "يعني... عمرك ما حسيتي بحاجة ناحيتي؟" سكتت نور شوية، وبعدين قالت: — "في الأول مكنتش بحس بحاجة.. بعد كده حبيت. مكنتش عارفة أمتى بالضبط، يمكن لما كنت بكون عيانة وتطلب للسواق يوديني المستشفى.. كنت بعتبر اهتمامك العادي ده حاجة كبيرة، وعشان كده قعدت التلت سنين كاملين.. كان عندي أمل صغير إنك في يوم تشوفني." غلي الدم في رقبة يونس: — "أنا شايفك دلوقتي والله!" ابتسمت نور بحزن: — "دي المشكلة يا يونس.. إنك عشان تشوفني، كان لازم تفتكر إنني مت الأول!" اتطلقوا رسمي بعد أسبوع. أم يونس راحت لنور المستشفى.. الأول تزايدت، وبعدين هددت، وفي الآخر اترجتها! مش عشان نور.. عشان الموردين فسخوا العقود مع الشركة، ومشروع القشاش هيروح منهم والشركة بتضيع! قالت لها: "بعد كل اللي عيلة الهواري عملته عشانك؟!" ردت نور لأول مرة بحسم هز القاعة: — "يا هانم، أنا في التلت سنين أكلت وسكنت عندكم.. وكل قرش اتقال عليه مصاريف شخصية، التقرير ده فيه حسابه بالمليم، وتحويل بنكي بحسابه نزل في حساب ابنك. أنا ممعيش ليكم قرش ولا عليا ليكم جميل!" وبصت ليونس: "وانتم كمان متلزمنيش بشيء." بعد شهر.. عملت شركة "الهواري" اجتماع جمعية عمومية طارئ. الشركة بتخسر، والأسهم نازلة. وفجأة.. دخلت نور القاعة! مش كمرأة يونس الهواري.. كـ "دكتورة نور مراد"، رئيس مجلس إدارة شركة "القشّاش للبيوتكنولوجي". داخلة بلبس رسمي وشيك، ماسكة ملفاتها، طالعة تشرح مشروع الأدوية الجديدة. الأعضاء اللي كانوا بيعاملوها زمان كأنها خدامة، قعدوا حاطين إيدهم على خدهم بيسمعوا عبقريتها لمدة 40 دقيقة! في الآخر، أخد واحد من الكبار الكلمة: — "إيه شروطك عشان نشتغل سوا ونعوض الخسائر؟" فتحت نور الصفحة الأخيرة: — "أنا مش جاية أشتغل معاكم.. أنا جاية أفعّل بند الشرط الجزائي وفسخ العقود اللي بيننا." القاعة اتكهربت وقامت القيامة! يونس كان يقدر يقاضيها.. يقدر يجرجرها في المحاكم سنين ويكسّر مجاديفها بالقانون والفلوس. بص لها يونس.. كانت مستنياه يقلب عليها. فقال يونس بصوت هادي وسط الظيطة: — "إحنا موافقين على الفسخ.. وهندفع كل الشروط الجزائية." الكل اتجنن: "انت اتجننت يا يونس?!" رد وهو عينيه في عينيها: — "العقود تخص الشركة.. بس حريتها متحكمش فيها فلوس." بصت له نور بذهول حقيقي لأول مرة.. وبعدين جمعت ورقها وقالت: "شكراً يا يونس بيه." عدت سنتين كاملين.. شركة نور كبرت وبقت مؤسسة عالمية، وأبحاث أبوها أنقذت آلاف المرضى. شركة الهواري وقفت على رجلها بالعافية.. بقت أصغر، بس يونس غير مديرين كتير وطهّر الشركة من الفساد. وفريدة خدت حكم بالسجن في قضايا التزوير والإضرار العمدي. في السنتين دول، يونس مدورهاش.. مكلمهاش، مبعتلهاش ورد، متفرعنش عليها.. عشان كان فاهم إن الأسف ميديوش حق في فرصة تانية! لحد ما في يوم.. بعد سنتين وسبع شهور من الطلاق.. اتقابلوا في مؤتمر أدوية كبير في القاهرة. نور كانت طالعة من قاعة المحاضرات، ولقته واقف جنب مكنة القهوة. اتسمروا هما الاتنين. — "أستاذ يونس." — "دكتورة نور." رفعت حواجبها: "دكتورة؟ غريبة منك." ابتسم يونس: "سمعت إنك أصريتي تستخدمي اللقب دلوقتي.. قلت ألحق الموجة." — "بعد ما خبيته سنين، أظن جه الوقت آخد حقي." ضحكت نور ضحكة خفيفة.. يونس اتسمر مكانه. عاش معاها تلت سنين، عمره ما سمع ضحكتها دي.. عشان عمره ما إداها سبب تضحك! — "نور.." — "نعم؟" — "أنا عمرِي ما جاوّبت على ورقتك اللي سبتيهالي." سكتت شوية افتكرت: "آه.. بتاعة 'انت كسبت'؟" — "أيوة.. كنت عايز أقولك بس... أنا مكسِبتش يا نور. أنا خسرت تلت سنين كان ممكن أعرفك فيهم بجد.. خسرت إنك تثقي فيا.. وكنت هخسرك للأبد عشان فاكر إن عدم الإيذاء المباشر كفاية.. أنا مكنتش عايش." بصت له نور طويل.. وقال يونس: "مش مستني منك تسامحيني.. بس كنت عايزك تعرفي إني فهمت." سألته: "وفهمت إيه؟" — "إن التجاهل... نوع من أنواع القسوة." هزت نور راسها ببطء: "تمام." مقالتقش مسامحاك.. بس كانت إجابة شافية. بصت في ساعتها: "أنا عندي عشا مع مستثمرين.. عن إذنك." — "تفضلي." مشيت خطوتين.. وبعدين وقفت ولفت له: — "يونس." دي كانت أول مرة تناديه باسمه من تلت سنين! — "فيه كافيه قدام قاعة المؤتمرات." — "عارفه." — "أنا هخلص بكرة بدري.. الساعة خمسة ونص." قلب يونس دق، بس حاول يمسك نفسه: — "هكون مستني هناك." بصت له بنظرة متسلية: "أنا مقلتش إنها عزومة ولا ميعاد غرامي!" ابتسم يونس: "ولا أنا افترضت كده." تاني يوم.. الساعة خمسة و23 دقيقة، كان يونس قاعد في الكافيه. نور جت بعد خمس دقائق.. قعدت قدامه، فتحت المنيو وقالت له وهي باصة في الورق: — "هو انت لسة بتكدب لما متبقاش عارف العلبة فيها إيه؟" وش يونس جاب ألوان لاتنين وشه اتخطف! فجأة ضحكت نور بصوت عالٍ: "بهزر معاك على فكرة!" حط يونس إيده على قلبه: "أنا أعصابي بتبوظ على فكرة.. انتِ بقيتي قاسية أوي!" — "بتمرن.. وبقيت شاطرة." طلب هو شاي، وهي طلبت قهوة.. وقعدوا يتكلموا.. مأتكلموش عن الجواز، ولا عن الجد، ولا عن فريدة.. اتكلموا عن الكتب.. عن أبحاث الأعشاب.. عن سفرها لسينا والصعيد.. عن كل حاجة كان المفروض يعرفوها عن بعض من تلت سنين. ولما خرجوا من الكافيه وكان الليل دخل.. مدّت نور إيدها وسلمت عليه: — "تصبح على خير يا يونس بيه." مسك إيدها بدفء: "وانتِ من أهله يا دكتورة نور." مشيت خطوتين.. ولفت تاني وقالت بابتسامة هادية: — "ممكن تقول لي يا نور عادي." ابتسم يونس من قلبه: "ماشي يا نور." مكنش عارف إيه اللي هيحصل بكرة.. يمكن يبقوا أصحاب، يمكن يرجعوا يحبوا بعض من جديد، ويمكن الكافيه ده يكون آخر صفحة يقفلوها بشياكة. بس لأول مرة.. يونس مكنش محتاج يتحكم في النهاية ولا يجبر الأحداث. عشان القصة م بقتش ملكه لوحده.. ونور.. الست اللي الكل افتكرها ساكتة وغلبانة وطيبة زيادة عن اللزوم.. رجّعت لنفسها الحجم والحق الوحيد اللي مكنش ينفع تفرّط فيه لأي حد: حقها في إنه هي اللي تختار وتحدد كملة قصة حياتها ازاي! (تمت القصة)

مقالات ذات صلة

ثمن الاصول بقلم منال علي ٢

فتاة التراب

هربتي ليلة فرحك ٢

انتي اتجننتي ٢

طبيخ سلفتي – زهرة الربيع

وجدت علبة حبوب منع الحمل

اترك تعليقاً إلغاء الرد