حكاية يارا وعمار
= رايحة فين؟
قالت بسرعة:
= هشرب مية.
وخرجت.
ريم لاحظت الحركة…
وعيونها ضاقت شوية.
—
في الجنينة…
عمار كان واقف جنب الشجرة…
بيبص للسماء وبيحاول يهدي أعصابه.
وفجأة سمع صوتها وراه.
= عمار.
لف وبصلها…
كانت واقفة قدامه…
وشها فيه زعل واضح.
سألها بهدوء:
= خرجتي ليه؟
يارا ردت وهي بتحاول تبان عادية:
= عادي… كنت عايزة هوا.
عمار ابتسم بخفة وقال:
= الكدب مش لايق عليكي.
يارا بصت له وقالت بغيرة واضحة:
= طب خليك جوه مع ريم… مش كانت عايزة تحكيلك حاجة؟
عمار قرب خطوة وقال:
= انتي فعلاً بتغيري.
يارا قالت بعصبية:
= لا مبغيرش!
عمار قرب أكتر…
وقال بصوت واطي:
= طب قوليلي… زعلانة ليه لما شوفتيها ماسكة إيدي؟
يارا سكتت…
وقلبها بيدق بعنف.
وقبل ما ترد…
سمعوا صوت الأب جاي من وراهم:
= عمار.
لفوا الاتنين…
الأب كان واقف…
وباصصلهم بنظرة صعبة.
وقال ببرود:
= كنت بدور عليك… عايزك في موضوع مهم.
وبص ليارا وقال:
= وانتي… اطلعي أوضتك.
يارا حسّت إن فيه حاجة غلط…
لكن سكتت ومشت.
الأب استنى لحد ما دخلت البيت…
وبعدين قال لعمار بجدية:
= أهل يارا هيجوا بكرة.
عمار اتجمد مكانه.
الأب كمل:
= وهي هتمشي معاهم.
—
تاني يوم الصبح…
البيت كان فيه توتر غريب.
يارا نزلت من أوضتها وهي حاسة إن في حاجة مش مظبوطة…
الخدامة بتجهز القهوة… وأم عمار بتظبط الصالون… وأبوه قاعد ساكت بطريقة مقلقة.
يارا سألت بتردد:
= في ضيوف جايين؟
أم عمار قالت وهي بتتفادى تبص لها:
= أيوه… ناس من قرايبك.
يارا اتفاجئت:
= قرايبي؟!
لكن قبل ما تسأل أكتر…
جرس الباب رن.
الخدامة راحت تفتح…
وبعد لحظات دخل راجل كبير في السن ومراته وشاب في العشرينات.
الراجل بص ل يارا بعين مليانة تأمل وقال:
= دي… يارا؟
الأب رد:
= أيوه… اتفضّلوا.
يارا واقفة مكانها مش فاهمة حاجة.
الراجل قرب منها وقال بصوت حنين:
= أنا عم أبوكي يا بنتي… عم حسن.
يارا عيونها وسعت…
عمرها ما شافته قبل كدا.
قالت بتوتر:
= أهلاً…
الأب دخل في الموضوع مباشرة وقال بجدية:
= إحنا كلمناكم عشان تيجوا تاخدوا يارا تعيش وسط أهلها.
الكلمة نزلت على يارا زي الصدمة.
= آخدني… فين؟
عم حسن قال:
= على بلدنا في الصعيد… بيت أبوكي وأهلك هناك.
يارا بصت حواليها بذهول…
وقالت بسرعة:
= بس… أنا عايشة هنا!
الأب رد ببرود:
= كنتي عايشة هنا… إنما خلاص كبرتي… والمفروض تبقي وسط أهلك.
