## الجزء الأول: زفة "حواتي" وقلب أمي اللي بـ مية راجل خرجنا من باب القاعة بعد ما كتبنا الكتاب، والمفروض عريسي يشيلني.. بس هو شال أمه! قال إيه "عايزة تعيش اللحظة هي كمان".. بس اللي أمي عملته بعد كده، صدم المعازيم كلهم وسكّت القاعة حتة واحدة. كان يوم سبت في أول الصيف، الشمس طالعة والجو يجنن. أبواب قاعة الفرح اتفتحت، والمعازيم وقفوا كلهم يبتسموا ويسقفوا، وكلهم رافعين الموبايلات عشان يصوروا لقطة العمر. في الثانية دي.. كل حاجة كانت كاملة ومثالية. وفجأة.. حماتي "فادية" طلعت قدام، وراحت ماسكة في دراع جوزي جامد. بطني اتكتمت ونفسي ضاق في ساعتها. طنط فادية من أول الفرح وهي بتتصرف كأنها في مسابقة ومين هياخد لقطة أكتر للكاميرا. قطعت المصور مرتين عشان "تظبط" زاوية وشها في الصور، وحتى المأذون مسبتوش في حاله، كانت بتقاطعه وتصلح له الكلام وهو بيكتب الكتاب! أي 30 ثانية الاهتمام يروح فيها عنها، كانت بتنهد تنهيدة درامية قاتلة، كأنها بطلة في فيلم أبيض وأسود بتموت من مرض مجهول! أنا كنت عارفة طبعاً إن حماتي بتموت في لفت الانتباه، بس عمري ما تخيلت إنها هتقلب يوم فرحي لأكبر مسرحية في حياتها. لما أنا و"عمر" بدأنا نخرج، كنت فاكرة طبعاً إنها بس حنينة بزيادة.. بعدين قلت يمكن وحيدة.. بعدين قلت لا دي متحكمة.. وفي الآخر اكتشفت إنها التلاتة مع بعض! عمر قَضى عمره كله بيتعامل مع تقلباتها المزاجية كأنها حالة طقس؛ ما تقدرش تعاندها، أنت بس تستعد لها وتغير خططك على أساسها وتستناها لما تعدي. والمشكلة إن أي حد تاني كان لازم يعيش في "النشرة الجوية" بتاعتها دي. فـ لما فادية مسكت دراع عمر، كنت متوقعة دراما.. بس مكنتش متخيلة هتوصل لفين عشان تسرق مني لقطتي. قالت بصوت عالي سَمّع نص القاعة: "يا حبيبي.. أنت عارف إن أنا عمري ما اتزفيت ولا عشت فرح حقيقي". عمر ضحك ضحكة مكتومة ومحروجة: "ماما.. مش وقته خالص.." حطت إيدها على صدرها بشكل درامي: "أنا شلتك 9 شهور في بطني.. سهرت بيك في كل سخونية، وكل كابوس، وكل كسرة قلب.. مش هي!" و راحت حدفت دقنها ناحيتي بـ قلة قيمة. "لمرة واحدة بس.. سيبني أحس اللحظة دي شكلها إيه". أنا بقيت ببحلق فيها.. هو اللي في بالي بجد؟ هي تقصد اللي أنا فكّرت فيه؟! حوالينا، الفرحة اللي كانت على وشوش الناس طارت، واتبدلت بزهول، وفي ناس بدأت تبتسم بـ تريقة. بصيت لعمر.. عيني جات في عينه، وكنت بترجاه بنظراتي إنه يوقف المهزلة دي.. إنه يتدخل ويلحق ليلتنا قبل ما تبوظ. هز راسه خفيف.. وفي ثانية، صدقت إنه هيوقفها. بس فادية قربت من ودنه وهمست بحاجة. مسمعتش قالت إيه.. بس شفت العزيمة والرجولة بتهرب من وش عمر في لحظة. بصلي بتردد وهو مش قادر يجيب عينه في عيني.. وبعدين.. وطى وشال أمه بين إيديه! همسلي وهو باصص في الأرض: "معلش يا حبيبتي.. بتزعل لو قلتلها لأ.. إنتي عارفاها بقى. هشيلك إنتي بعديها علطول ماشي؟ بس.. عشان النبي بلاش فضايح هنا". ناس كتير من المعازيم شهقوا.. وسمعت حد ورايا بيهمس: "يخرب بيتها.. مش ممكن!" فادية في ثانية لفت دراعاتها الإتنين حوالين رقبته، وابتسمت ابتسامة نصر كأنها كسبت جايزة وكادتني. فلاشات الكاميرات بدأت تنور حواليهم.. وراحت مغلية صوتها وقالت بفخر: "بصوا على ابني! هو ده الراجل اللي أنا ربيته وكبرته!" وفضلت أنا واقفة هناك.. لوحدي.. بفستان فرحي.. ماسكة بوكيه الورد في إيدي.. وبتفرج على جوزي وهو شايل ست تانية وخارج بيها من زفتنا! وشي كان بيغلي من الكسوف لدرجة حسيت إني هقع من طولاها.. عصرت بوكيه الورد في إيدي جامد عشان أمنع رعشة إيدي.. وزوري اتقفل.. وقلبي اتشرخ نصين. وفجأة.. حسيت بإيد حنينة على كتفي. أمي.. نزلت من على الكوشة بالراحة.. من غير ما تعلي صوتها.. من غير ما تعمل هي كمان خناقة.. بصتلي بـ نظرة لخصت كل الكلام اللي في الدنيا.. وراحت مادة إيدها وبصابعين اتنين ظبطتلي الطرحة بتاعتي.. وبعدين لفت وشها للمعازيم كلهم.. وعملت "حركة واحدة بس" مقصودة وذكية.. كل المعازيم في القاعة شهقوا من الصدمة.. الكاميرات كلها وقفت تصوير وفلاشاتها انطفت.. وجوزي وأمه وشهم قلب أبيض زي الأموات... ## الجزء الثاني والأخير: الكلمة اللي هدت المعبد! أمي لفت وشها للمعازيم، وملامحها بقيت حادة وجامدة زي الحجر.. وفي ثانية عملت حركة صدمت القاعة كلها.. وقفت في نص الممر وبدأت تسقف ببرود! المعازيم كلهم شهقوا من الزهول.. حتى المصور نزل الكاميرا من صدمته. "عمر" لف بسرعة لدرجة إن أمه "فادية" كانت هتقع من بين إيديه.. ضحكة النصر اللي على وش فادية اختفت، وعمر كان باين عليه اللخبطة والكسوف. وهنا أمي اتكلمت، وكل كلمة طلعت منها كانت زي الطلقة اللي سحبت الدم واللون من وشوشهم هما الإتنين. وبمنتهى الحزن والأسى اللي في الدنيا قالت: **"تمام.. أهو إحنا كدة كلنا فهمنا شكل الجوازة دي ورسمتها من أولها!"** ### السكوت اللي يسبق العاصفة الدنيا اسودت وسكتت في القاعة لدرجة إن لو دبوس وقع كان سَمّع. عمر نزل أمه في ساعتها على الأرض وقال بلجلجة: "طنط هدى.. حضرتك بتقولي كدة ليه؟" أمه فادية بدأت تعيط وتتمسكن: "ليه بتقولي كدة يا هدى؟ إنتي كدة بوظتي عليا لحظة عمري الجميلة!" محدش من المعازيم اتمزحزح من مكانه.. فردت أمي عليها بمنتهى القوة: **"ولحظة بنتي أنا؟ اللحظة اللي إنتي لسة متبوظاها حالا.. مين هيعوضها عنها؟"** حطت فادية إيدها على صدرها كالعادة بطريقتها الدرامية: "أنا طلبت حاجة بسيطة وصغيرة من ابني، وإنتم بتلووا الكلام وبتقلبوه عليا.. إنتي بتطلعيني أنا الشريرة في القصة!" وبصت للمعازيم حواليها بتدور على أي حد يدافع عنها أو يوافقها.. بس محدش نجدها.. المعازيم كلهم كانوا شافوا المهزلة بعينيهم، والحاجة لما بتطلع في النور بيبقى صعب أوي تدّعي إنها بريئة. بس أمي مكنتش لسة خلصت كلامها: **"إنتي اللي طلعتي نفسك كدة يا فادية.. بنتي كانت فاكرة إنها كسبت راجل وسند النهاردة.. بس الواضح إن ابنك أوردي متجوز مسؤوليته تجاهك!"** راجل من المعازيم ورا معرفش يمسك نفسه وطلعت منه ضحكة صدمة مكتومة. عمر كان وشه في الأرض وكان يتمنى الأرض تتشق وتبلعه، وفادية وشها قلب أحمر زي الدم من الغيظ. ### السؤال اللي عمره ما اتسأله وفجأة أمي التفتت لعمر دايركت وسألته: **"إنت اخترت أمك وفضلتها على مراتك قدام الناس دي كلها.. وأنا عايزاك تقولي حالا ليه؟ لما مراتك كانت محتجاك تقف جنبها وتحميها، ليه أول غريزة عندك كانت إنك تحمي أمك وتراضيها هي مش مراتك؟ فادية وشوشتك وقالتلك إيه في ودنك؟"** أنا كنت مراقبة وش عمر.. كان شكله زي الفار المحبوس في مصيدة. وفي وسط محاولاته إنه يلاقي رد، أدركت حاجة.. محدش في حياته كلها حطه في المواجهة دي وسأله السؤال ده بالوضوح ده قبل كده! زعقت فادية وهي بتدافع بـ غل: "إنتي دلوقتي بتهاجمي ابني عشان بار بـ أمه وبيتقي الله فيا؟" محدش رد عليها.. لأن عمر أخيرًا نطق وصوته مخنوق: **"قالتلي.."** وبلع ريقه بصعوبة.. **"قالتلي لو أحرجتها قدام الناس بعد كل اللي ضحت بيه عشان تكبرني.. مش هتعيش فيها وممكن يجرالها حاجة من حسرتها".** ست من المعازيم واقفة جنب الورد حطت إيدها على بقها من الصدمة. ملامح فادية اتقلبت في ثانية، وبصت لعمر بـ غضب: "إنت بتقلب عليا إنت كمان؟ إنت عارف إني مكنتش أقصد الكلام بحرفيته يعني!" عمر زعق لأول مرة في حياته في وشها: **"لأ يا ماما.. أنا معرفش! لإنك بتعملي كدة معايا طول عمري! كل ما أعمل حاجة مش على هواكي، فجأة تتعبي، أو يجيلك الضغط، أو تقولي إني مابحبكيش، وتقعدي تفكريني باللي ضحيتي بيه عشاني!"** دي كانت أول مرة في حياته كلها يقاطعها أو يعلي صوته عليها.. السكوت اللي في القاعة مبقاش سكوت محرج.. بقى سكوت حاد ومشدود.. كله فهم إن فيه حقيقة مدفونة من سنين وظهرت على الوش. ### الحقيقة المُرّة فادية حطت إيدها في وسطها وقالت: "دي اسمها أمومة يا محترم.. وإنت دلوقتي بتنكر الجميل وقليل الأصل". رد عمر: **"لأ.. ده اسمه تلاعب وسيطرة.. وأنا مش هسمحلك تتحكمي فيا تاني".** الكلمة نزلت على فادية زي القلم على وشها. جزء مني حس بالشفقة على عمر.. لما بتكبر في وسط الحصار العاطفي ده، مش بتشوفه على إنه أذى.. بتشوفه على إنه واجب.. وإنه حب. بس الشفقة دي بتبقى عاملة زي بطانية خفيفة ملهاش عازة.. لما تلاقي نفسك واقفة لوحدك بـ فستان فرحك والناس بتتفرج عليكي. عمر لف ناحيتي والدموع مغرقة عينيه: "أنا أسف.. أنا هزقتك وكسرت بخاطرك عشان كنت خايف أزعل أمي". بصيت له وقلت في سري: أهي دي الحقيقة.. وأخيراً نطقها. وقبل ما أرد، فادية انفجرت فينا كلنا: "إنتم كلكم مجانين! هو كان بيجبر بخاطري وبيردلي اعتباري لثانية واحدة.. ثانية واحدة بعد كل اللي عملته له في حياتي!" ردت أمي ببرود: **"بالظبط.. كل حاجة عندك بدين وثمن يا فادية".** فادية لفت لأمي وبغل: "إنتي فاكرة بنتك يعني ملاك ومفيهاش غلطة؟" أمي ملامحها متهزتش: **"لأ مش ملاك.. بس أنا عارفة إنها تستاهل راجل أحسن من كدة بكتير".** ### الهروب الكبير الكلام ده لمس حتة جوة قلبي وطمنها.. بصيت لإيدي.. دبلة الجواز كانت بتلمع تحت الشمس.. كانت لسة جديدة أوي ودمها خفيف في صباعي. عمر لمح نظرتي للدبلة.. وملامحه اتخطفت: "استني.." همس برعب. بالراحة خالص.. سحبت الدبلة من صباعي.. إيدي كانت ثابتة ومفيهاش رعشة على عكس ما كنت متوقعة. قرب مني وقال بترجي: "عشان خاطري بلاش تعملي كدة.. أرجوكي". فتحت إيده وحطيت الدبلة في كفه.. وقفلت صوابعه عليها. Ahmad Suliman افتكرت كل تنازل قدمته.. كل مرة طنش فيها حدودي.. كل مرة كنت بطلب منه يقف معايا ويدافع عني ويقولي: "معلش إنتي عارفاها بقى طبعها كدة". افتكرت كل عزومة وعشا كانت فادية بتقعد تعدل عليا وتنتقدني جوة شقتي أنا.. وعمر قاعد باصص في طبقه وساكت ومش قادر ينطق بكلمة. كل ده وقف حاجز بيني وبينه في اللحظة دي.. وكنت خلاص استكفيت ومبقتش قادرة أمثل إن الموضوع عادي. قلتله: **"أنا كنت عايزه راجل.. شريك حياة.. مش بني آدم بيحبني ويحميني لما أمه تسمحله بس".** الدموع نزلت من عينيه وقال: "أنا هصلح كل ده.. أنا عايزك إنتي.. أنا اخترتك إنتي". ويمكن ده كان أكتر جزء بيوجع في الحكاية.. إنه كان بيتكلم بجد.. كان صادق ومصدق إن الحاجة دي ينفع تتصلح. بس الحتة اللي بتهد وتتكسر.. ما ينفعش ترممها وإنت لسة واقف تحت أنقاضها. Ahmad Suliman رديت عليه: **"إنت اخترتني بعد ما أمي حطتك في خانة اليك وفضحتك.. أنا آسفة يا عمر، بس ما أقدرش أبدأ حياتي وجوازي مع راجل مبيعرفش يجيبلي حقي إلا لما حد تاني يزقه ويفوقه".** مكنش عنده رد.. ومبقاش فيه كلام تاني يتقال. مسكت بوكيه الورد واديته لأمي.. أخدته مني وهي ساكتة. وبعدين رفعت ديل فستاني.. ونزلت من على سلم القاعة لوحدي. ورايا.. كنت سامعة همهمة المعازيم.. وصوت خناق.. وصوت فادية الزاعق وهو بيقطع الهوا. مبصيتش ورايا خالص.. ومكنتش محتاجة أبص. لأول مرة طول اليوم ده.. محدش كان باصص على فادية عشان هي نجمة المكان.. كانوا باصين عليها لإنهم أخيراً شافوها على حقيقتها؛ ست مريضة بالحب والامتلاك. خرجت من الفرح ده من غير جوزِ.. لكام يوم بعديها.. كنت حاسة بالكسرة والفشل، وقلبي كان واجعني، وكنت بعيط على المستقبل اللي كنت رسماه في خيالي وضاع. بس مع الوقت.. أدركت إن المستقبل ده كان مجرد وهم ومش حقيقي. هل عمر كان هيحاول يقاوم سيطرة أمه؟ يمكن.. بس لحد إمتى؟ وكم مرة كان هيقع عليا أنا حمل إني أزقه وأجبره يحط حدود مع أمه ويمنعها؟ لحد النهاردة.. لما بفتكر يوم الفرح ده.. فيه صورة واحدة بس بتيجي في بالي واضحة وضوح الشمس: صورة عمر وهو شايل أمه وماشي بيها. والغريب.. إن الصورة دي مبقتش توجعني ولا بقيت أشوفها على إنها أسوأ لقطة في حياتي.. لإن خروجي من باب القاعة دي لوحدي وفستاني في إيدي.. كان أكبر نجدة وأعظم هروب ربنا كتبهولي في حياتي! Ahmad Suliman تمت بحمد الله
