بتعلي صوتك على امي

بتعلي صوتك على أمي؟ ده أنتِ أهلك معرفوش يربوكي بقى! قال كلامه من هنا ونزل على وشي بالقلم من هنا، أمه تسكت؟ لأ، ردت وقالت بشماتة وهي بتبص عليه وهو بيضربني: ـ تستاهل يا بني، اضربها وأدبها، دي قليلة الرباية. لحد هنا ومسكتش، رديت عليه وقلت بحرقة ودموعي نازلة على خدي: ـ أنت مش راجل، مفيش راجل بيمد إيده على ست ويبقى اسمه راجل، طلقني.. طلقني يا مروان وريحني منك ومن قرفك أنت وأمك. حماتي شهقت وحطت إيدها على صدرها وقالت بصدمة: ـ قرفك أنتِ وأمك! أنا وابني بقينا قرف؟ شوف يا بيه... شوف مراتك اللي كنت بتدافع عنها لما كنت بقولك إنها بتتطاول عليا وأنت مش هنا وبتقل أدبها وكنت بتكدبني وتقولي أكيد فهمتي غلط يا أمي، زينة مستحيل تعمل كده، شوف الهانم وهي بتغلط فيا وفيك عيني عينك. مروان عيونه احمرت وعروقه برزت لبره، مسكني من دراعاتي جامد وقال بزعيق: ـ صدمتيني فيكِ، طلعتي قليلة الرباية زي ما أمي قالت، غوري عند أهلك مش عاوز أشوف وشك تاني، ومفيش طلاق غير بمزاجي، خليكِ عند أهلك لا أنتِ اللي مطلقة ولا أنتِ اللي متجوزة، غوووري! زقني على الأرض بغضب، وقعت على إيدي وحسيت إن دراعي اتخلع من مكانه، ومتأكدة إن حصل فيه كسر. قمت وقفت وأنا ماسكة إيدي اللي شكيت إنها اتكسرت وقلت بحرقة وعياط من الظلم اللي حاسة بيه، وزوجي اللي اتصدمت فيه ومكنتش متخيلة إنه يمد إيده عليا في يوم من الأيام، أو يصدق عني كلام زي اللي اتقال من أمه: ـ حسبي الله ونعم الوكيل فيك أنت وأمك يا مروان، زي ما ظلمتوني، هيجي يوم وأشوف حقي وهو بيتاخد قدامي، وأنتِ يا حماتي ربنا يوريكِ اللي ورتيهولي والافتراء اللي شفته منك، كله يطلع على بنتك ويتحرق قلبك على بنتك زي ما حرقتي قلبي وحرقة أمي اللي هتشوفها لما أروحلها مضروبة ومتبهدلة. حماتي جات زقتني وقالت بزعيق وبجاحة: ـ وكمان بتحسبني؟ غوري من هنا، غوري يالا في داهية! بصيت لمروان جوزي بصة أخيرة، بصة كلها قهرة منه لأنه صدمني، نزل عينه في الأرض بس وشه كله غضب، قلتله بقهرة: ـ ماشي يا مروان، ماشي، بكرة ترجع ندمان وأنا مرضاش أرجعلك. حماتي ردت بداله وقالت ببجاحة: ـ مين ده يا عنيا اللي يرجع ندمان؟ ده أنا بكرة أجوزه ست ستك يا عنيا. قلت لها ماشي بكرة نشوف، وأخدت بعضي ومشيت على بيت أهلي وأنا مش قادرة أبطل عياط وماسكة دراعي المكسور والألم فيه حرفياً بقى لا يُحتمل. أول ما وصلت البيت خبطت على الباب بالعافية، سمعت صوت أمي وهي بتقول: ـ حاضر، مين اللي على الباب؟ جاية أهو. أول ما فتحت الباب، اتخضت وصوتت بعد ما حطت إيدها على صدرها: ـ يالهوي يا ضنايا! مين اللي عمل فيكِ كده؟ اترميت في حضنها وأنا بعيط: ـ ظلموني يا ماما، ظلموني وضربوني وقهروني. كانت بتحاول تستفسر مني وهي بترفع وشي: ـ هما مين يا بنتي؟ هما مين يا ضنايا؟ كملت عياط وأنا بشهق ومقدرتش أتكلم، أخدتني ودخلتني جوه وقعدت وقالتلي وهي بتمسك دراعي: ـ ماله دراعك؟ أنتِ ماسكاه ليه؟ سحبت منها دراعي بسرعة يألم وأنا بصوت وبعيط وقلتلها: ـ دراعي اتكسر، كسرولي دراعي وضربوني. أمي سمعت الكلام من هنا وقامت وهي بتصوت ورنت على بابا. بابا جه على طول من الشغل، وأخدوني ودوني المستشفى، جبست دراعي والدكتور أداني أدوية، وقالي دراعي معملش عليه مجهود. روحت البيت، بس كنت هديت وبطلت عياط، بابا قعد جنبي من ناحية وماما قعدت من الجنب التاني، بابا اتكلم بهدوء وهو بيطبطب عليا: ـ أنتِ هديتي أهو، احكي لنا بقى إيه اللي حصل؟ بدأت أحكي: ـ أنا كنت قاعدة في أمان الله بحضر الغداء عشان مروان جوزي جاي من الشغل، وحماتي كانت قاعدة في الصالة وأنا والله ما كلمتها، لقيتها جيالي المطبخ وبتقولي: ـ إيه اللي أنتِ بتعمليه ده يا زينة؟ رديت عليها وقلت لها بهدوء: ـ بحضر الغداء يا ماما. قالتلي ببرود: ـ ما أنا عارفة ياختي إنك بتحضري الغداء، هو أنا عمية؟ ولا قصدك إني كبرت وخرفت واتعميت؟ أنا بسأل على الأكل اللي بتحضريه، إزاي تعملي سمك مقلي وأنتِ عارفة إني مبحبهوش؟ رديت عليها بعد ما اتضايقت من كلامها: ـ أنا مقلتش كده يا ماما، وبعدين أنا عملت السمك عشان مروان بقاله يومين يقولي أنا نفسي آكل سمك مقلي، وعشان حضرتك مش بتاكليه، أنا عملتلك كبدة. ردت عليا وهي بتشهق: ـ عاوزة تعزليني عنكم؟ بتقرفوا مني عشان كده عملالي أكل غير أكلكم؟ ده ناقص تقوليلي خدي طبقك واقعدي في الركن وكلي لوحدك! كنت خلاص جبت آخري من استفزازها ليا وقلتلها بزعيق: ـ أنتِ عاوزة إيه يعني؟ لا كده عاجب ولا كده عاجب! أنتِ عاوزة تعملي مشاكل وخلاص؟ لقيتها بتولول وقالت: ـ أنتِ قصدك إني بخترع المشاكل وكمان بتزعقيلي؟ ملاحقتش أرد عليها ولقيت مروان جه من الشغل، أول ما شافته جريت عليه وقالتله بعياط: ـ تعالى يا مروان، تعالى شوف مراتك وهي بتهيني في بيتك وبتقولي أنتِ زيك زي الكلبة وقالتلي أنتِ من هنا ورايح تاكلي لوحدك. مروان اتفاجئ بالكلام لأنه عارفني إني مش كده ومستحيل أعمل كده، رد وقال: ـ اهدي بس يا أمي، إيه اللي حصل؟ ردت وقالت وهي بتعيط بتمثيل: ـ مراتك بتقل مني ومبتصدق إنك تروح الشغل عشان تهيني وتكسر بخاطري، والنهاردة اتفاجئت إنها مش عاوزاني آكل معاكم. أنا المرة دي اتدخلت في الكلام وقلت بغضب بعد ما كنت خلاص جبت آخري منها: ـ أنتِ ست كدابة، والكلام ده محصلش، ليه عاوزة تخربي بيتي؟ أول ما قلت الكلام ده لقيت مروان نزل على وشي بالقلم وقال: ـ بتعلي صوتك على أمي؟ ده أنتِ أهلك معرفوش يربوكي بقى! أمه فضلت تشعللها وأنا حسبنت فيهم ووقعوني على الأرض ودراعي اتكسر، ومروان قالي غوري عند أهلك لا أنتِ اللي هتطلقي ولا أنتِ اللي متجوزة. أول ما خلصت كلام من هنا، عيطت واترميت في حضن ماما اللي بدأت هي كمان تعيط على عياطي وتطبطب عليا، بابا عينه احمرت وعروقه برزت، وقال بغضب وهو بيقف....... الواد ده لازم يتربى هو وأمه ومحدش هيربيهم غيري. بابا قال الكلام ده بغضب ومتعصب جدًا. ماما ردت عليه وقالتله: _استهدى بالله يا أبو زينة، استهدى بالله يا خويا، الواد والله كان طيب وابن حلال وبيحب البنت، بس كله من أمه الحرباية اللي بتلعب بدماغه، هي السبب، حسبي الله ونعم الوكيل. أبو زينة رد عليها بزعيق وهو بيشوح: _عاوزاني أسكت ازاي وأنا بنتي جيالي مضروبة ودراعها مكسور؟ أسكت ازاي وهو بيقولها هخليكِ لا إنتِ اللي مطلقة ولا اللي متجوزة؟ أقف أسقفله هو وأمه وأقولكم شاطرين وكملوا؟ قولي كلام معقول يا أم زينة، والله لأوريهم النجوم في عز الضهر. زينة صوت عياطها بقى أعلى من الكل، وأم زينة بقت تطبطب عليها بحسرة ومعرفتش ترد على جوزها تقوله أي لأنه معاه حق. أبو زينة ساب البيت بغضب وهبد الباب وراه ونزل، تمتمت أم زينة وراه وقالت: _استرها يارب. أما عند مروان، كان قاعد على الكنبة وحاطط إيده على راسه، مش عارف اللي عمله ده كان صح ولا غلط، خصوصًا إنه عارف زينة كويس، وعارف إن أمه مش بتحبها وتتبلّى عليها، بس هي غلطت فيه وقالتله إنت مش راجل، وعلت صوتها على أمه وهو واقف. قاطع تفكيره صوت أمه وهي بتقعد جنبه وبتقول بلؤم ومكر: _قاعد حزين كده ليه يا واد؟ شايل طاجن ستك ليه، تروح واحدة تيجي بدالها ألف واحدة، والله بكرة لأجوزك ست ستها ولا تزعل نفسك. أبو زينة نزل من البيت والشرار بيطير من عينه، ركب عربيته وطار على بيت مروان. في الوقت ده مروان كان لسه قاعد مكانه، وكلام أمه عمال يوز في ودنه زي الشيطان: _يا واد فكك منها، دي واحدة لسانها طويل، وبكرة أما تلاقي نفسها مرمية عند أهلها هتيجي تبوس رجلك عشان ترجعها. قطع كلامها خبط ورزع على الباب، وكأن البيت هيتهد فوقهم. مروان قام فتح، لقى أبو زينة في وشه، وقبل ما ينطق بكلمة، لقى قلم نزل على وشه لفّ دماغه 360 درجة. أبو زينة بزعيق هز العمارة: _بقى إنت يا شحط يا عديم الرجولة، تمد إيدك على بنتي وتكسر دراعها؟ هي دي الأمانة اللي أمنتك عليها؟ الحماة جات تجري وهي بتصوت: _يا مصيبتي! بتضرب ابني في بيته يا راجل يا ناقص؟ ده إحنا اللي هنحبسكم بتهمة التهجم علينا. أبو زينة بص لها باحتقار وقال: _اسكتي يا ولية يا عقربة، حسابك معايا بعدين. أما أنت يا مروان، فـ بنتي مش هترجعلك تاني، وحق بنتي هاخده تالت ومتلت. أبو زينة مدهمش فرصة يردوا، سابهم ومشي وهو ناوي على نية سودة. راح مباشرة على القسم وعمل محضر تعدي بتقرير طبي من المستشفى يثبت كسر دراع زينة وكدمات الوش. في بيت أهل زينة (بعد يومين) زينة كانت قاعدة، وشها لسه معلم فيه أثر القلم، ودراعها متجبس، والوجع اللي في قلبها أكبر بكتير من وجع جسمها. فجأة جرس الباب رن. أم زينة فتحت، لقت مروان واقف بوش دبلان ومعاه واحد من قرايبه، كبير العيلة عندهم. أبو زينة خرج وقال بحدة: _جاي ليه يا مروان؟ مش قولتلها غوري؟ أهي غارت، والباب اللي يجيلك منه الريح سده واستريح. قريب مروان اتكلم بهدوء: _يا حاج، الشيطان دخل بينهم، والصلح خير، مروان ندمان وعاوز يرجع مراته. زينة خرجت من جوه بصعوبة، وصوتها كان طالع بالعافية بس فيه قوة غريبة: ـ ندمان على إيه يا مروان؟ على القلم اللي علم على وشي؟ ولا على دراعي اللي اتكسر؟ ولا على كرامتي اللي اتهانت قدام أمك وهي بتشمت فيا؟ مروان قرب منها بلهفة: _زينة، أنا كنت متعصب، وأنتِ غلطتِ في أمي.. زينة قطعت كلامه بضحكة وجع: _أمك؟ أمك اللي كدبت كدبة وصدقتها؟ أمك اللي خلتك تمد إيدك عليا وأنا كنت بحضرلك لقمة تاكلها؟ بص يا مروان.. أنت سقطت من نظري يوم ما صدقت كدبها، ويوم ما استقويت بـ عضلاتك على واحدة ملهاش ذنب. أبو زينة اتدخل وقال: _مفيش رجوع، وبنتي رفعت قضية خلع، ومحضر الضرب هيمشي في سكة التعويض.. خد ابنك يا حاج وتوكلوا على الله. مرت الشهور، مروان حاول يضغط على زينة بكل الطرق، بس هي كانت صلبة. الحماة بدأت تنفذ وعدها وجوزت مروان بنت أختها سحر. وسحر دي بقى كانت نسخة مطورة من الحماة، بس على أشرس. في يوم، زينة كانت ماشية في الشارع، شافت حماتها السابقة قاعدة على رصيف قدام صيدلية بتعيط ومنهارة. زينة قلبها رق، وقربت منها: _مالك يا طنط؟ فيه إيه؟ الحماة رفعت راسها، وشها كان باهت ومخطوف، وأول ما شافت زينة، زادت في العياط: _سامحيني يا بنتي.. حقك بيتاخد مني تالت ومتلت. بنتي (أخت مروان) جوزها طردها في نص الليل ومسح بكرامتها الأرض، ومروان.. مروان مراته الجديدة سحر طردتني من الشقة ورمت لي هدومي في الشارع، ومروان زي الخاتم في صباعها مبيفتحش بقه. زينة بصت لها بأسى وقالت: _شوفتي يا طنط؟ الكاس اللي شربتيهولي، بنتك بتشرب منه، وأنتِ كمان بتشربي منه من نفس الماركة. أنا دعيت وقلت ربنا يوريني فيكِ يوم، واليوم جه بدري قوي. الحماة بكسرة: _أبوس إيدك يا زينة، مروان لسه بيحبك، ارجعيله وخرجينا من المصيبة دي. زينة ردت بكل ثقة: _أنا اتجوزت يا طنط.. اتجوزت راجل بجد، عرف قيمتي من أول يوم ومبيسمحش لـ هوا يلمسني. مروان كان درس قاسي اتعلمت منه إن اللي ملوش خير في مراته ويصدق عليها الكذب، ملوش أمان. سابتها ومشيت، وهي حاسة إن قلبها اللي كان مقهور، برد وشفى غليله. مروان خسر كل حاجة؛ خسر البيت، والسكينة، وزينة، وقعد تحت رحمة واحدة ميتخافش منها غير من شرها، عشان يعرف إن دعا المظلوم ملوش حجاب. "اللي يظلم يتهيأ له إنه كسب الجولة، بس الحقيقة إن الدنيا سلف ودين، والظلم ظلمات يوم القيامة." تمت.

مقالات ذات صلة

هل يجوز الجمع بين المرأة وزوجة أبيها المتوفى؟

ضرتي حامل -‘ نرمين همام

رجعت من الشغل ٢

آخر ليلة للخوف- محمد نور

المرأة مشت على خطوات

رواية اتخـ,ـانقت انا و مراتي كاملة

اترك تعليقاً إلغاء الرد