الصباحية- حكايات محمد نور
لفت الحاجة فاطمة براحة ووشها مخطوف…
بس اللي كان واقف على عتبة الباب مطلعش ابنها!
ده كان الحاج إبراهيم.. جوزها.
كان واقف هناك بجلابيته الرمادي القديمة، ووشه شاحب زي الأموات، وساند بإيد على حلق الباب كأن رجليه مش شايلينه.
لقواني، ما حدش فيهم نطق بكلمة.
وأصابع الحاجة فاطمة المرتعشة كانت لسه فردة الورقة المطبقة.
همست بصوت مخنوق: «إبراهيم… أمال أحمد فين؟»
الحاج إبراهيم مجاوبش، عينه راحت الأول على منى اللي مرمية جثة هامدة على السرير، وبعدين على الورقة اللي في إيد مراته.
وفي اللحظة دي، الحاجة فاطمة فهمت حاجة ترعب..
ده كان عارف! كان عارف بكل حاجة قبلها.
سألته وصوتها بيتقطع: «هو إيه اللي حصل هنا بالظبط؟»
خطا الحاج إبراهيم جوه الأوضة وقفل الباب وراه. الصوت الصغير ده عمل رجفة في قلب العجوزة.
قال بصوت واطي: «اقري بقية الورقة».
بصت له الحاجة فاطمة وكأنها خدت قلم على وشها: «يعني إيه اقرى البقية؟ مرات ابننا مرمية بالمنظر ده، وأحمد ملوش أثر، وعايزني اقرى؟»
اتوسل ليها وصوته بيرتعش: «أبوس إيدك… لازم تعرفي الحقيقة قبل ما تصوتي وتلمي الناس».
”الحقيقة”.. الكلمة نزلت عليها زي دش المايه الساقعة.
بإيدين بتترعش، فتحت الحاجة فاطمة الورقة تاني وتاني عشان تكمل قراية:
”أمي.. لما تقري الكلام ده، أرجوكي بلاش تظلمي منى. هي حاولت تمنعني، واترجتني بدموعها إني ما أعملش كده.. بس أنا ما قدرتش أعدي ليلة الدخلة من غير ما أقول الحقيقة.”
نَفَس الحاجة فاطمة بقى سريع ومش مظبوط، وبصت لمنى تاني. وش البنت كان شاحب، بس العجوزة لمحت حاجة تانية؛ إيد منى كانت قافلة بقوة على سلسلة فضة صغيرة.. سلسلة أحمد، اللي لابسها في رقبته من وهو عيل صغير.
تابعت الحاجة فاطمة القراية:
”إنتي ياما قولتِ لي إن شرف العيلة وإسمها أهم من أي حاجة في الدنيا، وإن راجل من صلبنا ما يصحش يجيب العار للبيت ده أبداً. بس الليلة اللي فاتت، وبعد ما كل الناس مشيت، عرفت السر اللي أبويا مخبيه ومقفل عليه من خمسة وعشرين سنة…”
اتسمرت الحاجة فاطمة في مكانها، وعينها راحت ببطء ناحية الحاج إبراهيم، اللي كان موطي راسه وعينه في الأرض من الخزي.
همست: «لا… لا يا إبراهيم، وادك بيتكلم عن إيه؟»
شفايف الحاج إبراهيم اتحركت، بس ما طلعش منهم أي حس.
