مفاجأة المطعم – محمد نور
— وهانة الناس والعائلات كان من ضمن المطلوبة؟
— أنا ما قصدتش…
— أنتِ قولتيه قدام بنتي!
سكتت تماماً.
— وجزاءات الموظفين والافتراء عليهم؟
ما ردتش.
— والتلاعب بالبونص؟
بصت في الأرض.
— واستغلال فلوس الشركة لمجاملة معارفك؟
— ما كل الناس بتعمل كده!
ردت أماني بسرعة:
— الأوراق والتقارير بتكذب كلامك.
وفاء بدأت تصرخ بانهيار:
— أنا اللي قومت الفرع ده! لما جيت المبيعات كانت ميتة وأنا اللي رفعتها!
ميار زقت نفسها وقالت بصوت عالي من بعيد:
— إحنا اللي قومناه!
وفاء بصت لها بحدّة، بس ميار كملت:
— الطباخين اللي بتهينيهم لما طبق يتأخر، الويترات اللي بتجبريهم يسهروا أوفلاين من غير أجر، والبنات بتوع الاستقبال اللي بتشيليهم غلطات غيرهم.. إحنا الموظفين الغلابة اللي شلنا المكان ده على كتافنا!
اثنين موظفين كانوا وافقين على جنب هزوا رأسهم بالتأييد.. وبعدين واحد ثالث.. ورابع.
ما حدش صقف، بس الموقف كان أقوى من أي تصقيف.. كان موقف ناس بتكسر حاجز الخوف.
بصيت لـ أيمن وقلت له:
— تتوصل وقف عن العمل فوراً.
وفاء فتحت عينيها بشرارة:
— توقفني أنا؟!
— لحد ما التحقيق يخلص.
أماني أضافت:
— وبناءً على الأدلة المالية، الشركة هتبدأ إجراءات الفصل التعسفي وبلاغ للنيابة العامة والتفتيش المالي.
وفاء شاورت عليا بغل:
— أنت جاي من الأول وقاصد تطردني!
— لأ..
قربت منها خطوة وقلت:
— أنا جيت عشان أعرف الحقيقة..
وشاورت على التربيزات الفاضية:
— كان ممكن تتعاملي معايا كأي زبون عادي بكل احترام..
وشاورت على ميار:
— كان ممكن تعاملي الموظفين بتوعك بآدمية..
وبصيت للملف:
— وكان ممكن تديري الفلوس بأمانة من غير ما تسرقي.. أنا ما اخترتش ليكي أي حاجة من دول، أنتِ اللي اخترتي بنفسك.
وفاء مسكت شنطتها بغضب:
— هتندم على اليوم ده!
أماني قفلت الملف:
— قبل ما تخرجي، هنسلمي العهدة، مفاتيح المكتب، واللاب توب، وتلفون الشغل.
المديرة بصت لرجال الأمن اللي كانت طالباهم عشان يرموني بره.. واحد منهم مد إيده وقال بجمود:
— المفاتيح بعد إذنك يا فندم.
لأول مرة الليلة دي حسيت بسخرية القدر.. مش فرحة ولا شفاتة، مجرد سخرية.
حطت وفاء المفاتيح على التربيزة بصوت يرن في المكان، ومشيت ناحية الباب والأمن وراها.
فريدة استنت لما خرجت وسألتني:
— بابا.. هو أنت بجد صاحب المطعم ده؟
