لقاء بعد الطلاق – محمد نور
أول ما الحفلة خلصت، يوسف جرى عليّ.
— بابا.. أقصُد يا ماما، شفتي الراجل اللي اسمه أحمد القبالي كان بيبصلي إزاي؟
— اه شفته.
— أنتِ تعرفيه؟
قبل ما أرد عليه، الميس نادت عليه عشان يتصور صورة جماعية مع زمايله الفايزين.
استنيت لحد ما يبعد.
وفجأة سمعت صوت ورايا:
— مريم.
لفت.
أحمد كان واقف على بعد خطوتين بس.
— ده ابني.
مقالهاش كأنه بيسأل، كان متأكد.
— اه.
غمض عينيه بوجع.
— أنتِ كنتِ حامل لما اتطلقنا.
— اه.
— ليه في داهية مقولتليش؟
نبرة الاتهام واللي أكنه بيحاسبني عصبني بشكل مكنش حصلي حتى يوم طلاقنا.
خلاها تغلي جوايا.
— أنت بجد جاي تبدأ بإنك تلومني أنا؟
— كان من حقي أعرف!
— السونار كان جوه شنطتي!
أحمد اتسمر في مكانه.
— إيه؟
— كنت ناويه أطلعهولك بعد ما نبصم. بس تليفونك رن وكانت فرح. كنت مستعجل ترُوح لها لدرجة إنك قولتلي بلاش شغل الأطفال ده ومحاولتش حتى تسمعني.. فاكر؟
وشه أصفر ومبقاش عارف يرد.
— مريم.. أنا مكنتش أعرف.
— لأ.. مكنتش تعرف عشان أنت مكنتش شايف حاجة أساسًا! أنت حتى ممشيتش عينك على البند اللي في الورقة اللي بيقر إن مفيش أطفال! كل اللي كان هامك إنك تخلص مني وتجري!
— لو كنتِ قولتيلي…
— كنت هتعمل إيه يعني؟
فتح بقه.. وماعرفش ينطق.
— بالظبط كده. (قولتهاله)
بص ناحية يوسف.
— أنا عايز أتكلم معاه.
— مش النهاردة.
— أنا أبوه!
— ده على الورق وفي الدم بس.
فكّه اتشد بغضب.
— أنتِ مش هتمنعيني أعرف ابني!
— أنا مش همنع أي حاجة فيها خير ليوسف، بس في نفس الوقت مش هسمحلك تظهر فجأة بعد تسع سنين وتقلب حياته عشان بس تريح ضميرك وترضي عقلك.
أحمد وطي صوته.
— هو يعرف أنا مين؟
— يعرف إن أبوه مكنش موجود.. ميعرفش اسمك.
— كنتِ ناوية تخبي عليه طول العمر؟
— كنت ناوية أحكيله لما يكبر ويبقى واعي، عشان يسمع الحكاية من غير ما يحس إنه مجبر يكرهك عشان يرضيني.
الكلام ده سكتّه خالص.
ولأول مرة أشوف أحمد بتاع زمان، قبل الفلوس والشركات والرغبة في إنه يتحكم في كل حاجة.
كان باين عليه الخوف بجد.
— سيبيني أشوفه خمس دقايق بس.
— لأ.
— مريم، أبوس إيدِك.
— النهاردة هو كسب أهم جائزة في حياته، مش هسمح إن بكرة يفتكر اليوم ده بس بإن ده اليوم اللي ظهر فيه أبوه.
مسكت شنطتي.
— لو بجد عايز تعرفه، اعمل ده صح. اطلب استشارة أسرية، اتكلم مع المحامية بتاعتي.. وافهم حاجة واحدة من دلوقتي: الوقت والشروط يوسف هو اللي يحددها.
