طلاق ورفض الاجهاض – محمد نور
اخترت شقة الزمالك… أوضتين، شبابيك كبيرة، وتراس صغير. مفيهاش أي حاجة تفكرني بالقصر البارد اللي قضيت فيه ثلاث سنين ماشية في سكوت.
لما آسر عرف بالنقلة، جه قبل ما أخلص تفريغ الشنط:
— بتعملي إيه؟
العمال اتسمروا مكانهم، وأنا رفعت عيني من الصندوق:
— بنقل.
— من غير ما تقوليلي؟
— إحنا متطلقين.
— إنتي حامل!
— أنا حامل مش عاجزة!
مرر إيده في شعره… الحركة دي كانت غريبة عليه، آسر عمره ما بيعمل حركة ملهاش لازمة:
— البيت بتاعك.
— عارفة.
— أمال ماشية ليه؟
بصيت حواليا:
— عشان كل أوضة هناك بتفكرني إني كنت عايشة مستنية جيتك… خلال ثلاث سنين، كنت بتعشى لوحدي أربع ليالي في الأسبوع، كنت بسهر مستنياك وأنت مسافر، حفظت مواعيدك، عرفت بتحب أكل إيه وبتشرب قهوة إيه وبتحب تسمع ميوزيك إيه وأنت شغال… وأنت حتى ما كنتش تعرف إن ريحة السمك كانت بتجيب لي غممان نفس من الأسبوع السابع!
آسر فتح بؤه وما طلعتش منه كلمة.
ضفت بهدوء:
— أنا مش زعلانة يا آسر… أنا بس تعبت.
وكانت دي الضربة القاضية. الغضب كان يقدر يواجهه، والزعل كان يقدر يعوضه، بس التعب… لأ.
— سيبيني أصلح اللي حصل.
هزيت رأسي بالرفض:
— أنت أصلحت خلاص… أنت مضيت على الورق.
رفعت إيدي الشمال… الخاتم كان اختفى.
شيرين جالي بعد ثلاث أيام. المرادي من غير فستان شيك… جينز، بالطو بيج، وهالات سودة تحت عينيها:
— محتاجة أتكلم معاكي.
— ليه؟
— عشان آسر مش راضي يسمعني.
كنت هقفل الباب في وشها:
— يبقى مش شايفة إزاي أقدر أساعدك.
— الطلاق كان بسببي…
— أنا عارفة ده.
— لأ… إنتي مش عارفة كل حاجة.
دخلت لما وسعت لها، وقعدنا قدام بعض. شيرين أخدت ثواني عقبال ما تتكلم:
— من ثلاث سنين، قبل ما تتجوزوا، أنا حاولت أرجع.
إيدي اتجمدت على الفنجان:
— إيه؟
— كلمته…
حسيت ببرودة في جسمي:
— وقال لك إيه؟
— قال لي إنه هيتجوزك.
— وده معناه إيه؟
شيرين بصت للأرض:
— أنا طلبت منه يلغي الفرح.
قلبي دق دقة قوية:
— ورده كان إيه؟
— قال لي لأ… قال لي إنه أدى كلمة.
الكلام ده وجعني أكتر ما توقعت. هو ما اختارنيش… هو بس أوفى بعهده!
— وليه سمع لك دلوقتي؟
شيرين اتنهدت:
— عشان المرادي قلت له الحقيقة… السبب اللي خلاني أسيبه زمان.
— إيه هو؟
صوابعها اترعشت:
— أبوه دفع لي فلوس عشان أختفي… خمسة مليون جنيه.
