ترقية جوزي – محمد نور
هز رأسه بالطلب بهدوء جداً.
وبعدين بصلي وقال:
* “العلاقة التانية اللي بيني وبينها بدأت بعدين.. مش من الأول.”
* “مش محتاجة أعرف الجدول الزمني لخطيئتك.”
* “عاوزك تعرفي..”
* “مش عاوزة أعرف يا هشام.”
قمت وقفت:
* “بقالي ست سنين كنت بتطلب مني أختفي وأتضاأل كل ما حياتي وشغلي يبقوا مش لايقين على برستيجك وروايتك قدام الناس.. ودلوقتي أنا هديك الحاجة الوحيدة اللي قضيت كل الوقت ده تطلبها مني.”
عينيه اتملت دموع وقال:
* “مساحة؟”
* “غيابي الكامل عن حياتك.”
مسكت شنطتي ومشيت ناحية الباب.. وما حاولش يوقفني.
بعد ثلاث شهور، التحقيقات اتوسعت جداً.
جمعية “حماة الوطن” طلعت مش زي ما نادية حماتي كانت فاكرة خالص.. ناس كتير فيها اتوجهتلهم تهم فساد وتسهيل استيلاء على مال عام.
شيرين مراد عملت صفقة مع النيابة العامة واقرت بالتهم عشان تخفف الحكم.
وهشام واجه تحقيقات عسكرية وجنائية بتهم تسريب معلومات حظر نشرها، وإعطاء تصريحات كاذبة، والحصول على منافع غير مشروعة.
ترقيته لاتلغت تماماً وخرج من الخدمة.
أنا ما اتدخلتش في عقوبته ولا تفاصيل محاكمته.. فضلت رافعة إيدي تماماً بحكم تعارض المصالح، وده كان يهمني جداً.
الناس بعد كده حاولوا يحكوا القصة بأشكال مختلفة:
فيه ناس قالوا إني دمرت جوزي..
وناس قالوا إني فضحت جوزي قدام الناس.
وشوية ضباط من اللي حضروا الحفلة اتصلوا بيا بعدين واعتذروا لي إنهم بقالهم سنين فاكرين إني زي ما هشام كان بيقول: عاطلة.. معتمدة عليه.. وماليش كيان.
واحد منهم اعتذرلي إنه في عزومة من السنين شرحلي الحياة العسكرية وكأني عمري ما لبست بدل عسكرية!
قُلتله ما يشغلش باله والموضوع انتهى.
في الوقت ده، كان عندي حاجات أهم بكتير مركزة فيها.
الشغل في القاهرة كان صعب ومجهد جداً.. الساعات طويلة والمسؤولية أتقل من الأول بكثير.
بس لأول مرة من سنين، بطلت أصغّر من حجم حياتي وشغلي عشان يناسب إيجو وحجم حد تاني!
بعد ست شهور من حفلة الترقية، رجعت لنادي الضباط في الجلاء عشان اجتماع رسمي ومؤتمر.
وصلت ببدلتي العسكرية الكاملة.. بدلتي أنا!
المقدم نوران الألفي.
وأنا ماشية في صالة المبنى الرئيسي، ظابط ملازم صغير كان معدي في الاتجاه المباشر، شاف رتبتي، وشد جسمه وضربلي تعظيم سلام عسكري.. رديت عليه السلام بهدوء واحترافية.
