عشيقة جوزي – محمد نور
— عايزة إيه؟
— تقوليلـي حسام طلب منك إيه بالظبط.
— مطلبش حاجة.
قمت وقفت:
— تمام… بالتوفيق مع النيابة بقى.
— استني!
وقفت.
نادين بصت حواليها بخوف:
— كان عايزك تخربي الجوازة وتطلبي الطلاق.
— ليه؟
— فيه بند فرعي في عقد الجواز… لو أطلقتوا قبل ثلاثين يوم، من حق الشافعي تجميد أسهم الجوهري لحد ما النزاع المالي يتحل.
أنا مكنتش أعرف البند ده… ولا أدهم كان قالي عليه.
— ومين حط البند ده؟
— حسام.
— والصورة؟
— كانت عشان تخليكي تفتكري إن أدهم لسه معايا فتفتعلي مشكلة وتطلبي الطلاق.
— والتمثيلية دي كانت متظبطة؟
وطت رأسها في الأرض:
— أيوه.
رغم إني كنت متوقعة، بس سماع الحقيقة أحدث جوايا مزيج غريب من الراحة والغل.
— وأدهم كان يعرف؟
— لأ.
— نمتي معاه الليلة دي؟
عينيها اتملت دموع:
— لأ!
ضحكت بمرارة:
— أنا بقالي سنين بحاول أقنع نفسي إنه لسه بيحبني… بس لما شافني تاني الليلة دي…
— قالك إيه؟
— قال إن اللي كان بيننا انتهى من زمان أوي ومفيش أمل.
الكلام ده مكنتش متوقعة أسمعه من نادين.
كملت نادين:
— حسام أقنعني إن جوازكم ده مجرد صفقات وعقد على ورقة، وإن لو طلقتوا، أدهم هيرجعلي… وأنا صدقته… كنت عايزة أصدقه!
لأول مرة، مشايفي قدامي منافسة… شايف ست حولت ذكريات قديمة لوهم، وسمحت لراجل مجرم يستغل ضعفها.
ده مبيبرأهاش… بس يخليها مفيدة.
— ساعديني نخلص من حسام… وأنا هقفل ملف عيلتك.
اجتماع مجلس إدارة شركة الشافعي الطارئ اتعمل يوم الإثنين.
حسام دخل الاجتماع وهو متأكد إنه كسب اللعبة خلاص.
الأخبار عن شركة الجوهري كانت مكسرة الدنيا، والمجلس كان قلقان، وبابا كان لسه رسمياً اختفائه معلن.
ونادين كانت جاهزة تلعب دورها.
دخلت القاعة بعد بداية الاجتماع بنص ساعة.
حسام ابتسم بثقة:
— ممتاز… كده النصاب كمل.
أدهم كان قاعد على رأس الترابيزة، وأنا على يمينه.
حسام حط ورق قدام المجلس:
— نظراً للمخالفات المالية لشركة الجوهري، أنا بقترح تفعيل بند الحماية فوراً ونقل إدارة أرض المارينا لمجموعة الشافعي.
بعض الأعضاء هزوا رأسهم بموافقة.
وهنا نادين اتكلمت:
— قبل ما تصوتوا… اعتقد لازم تسمعوا حاجة الأول.
حسام اتجمد في مكانه.
نادين حطت موبايلها على الترابيزة، واشتغل تسجيل صوتي:
صوت حسام ملا القاعة:
“إنتي بس خلي سارة تفقد أعصابها… ابعتيلها الصورة… خليها ترفع قضية طلاق… وباقي الترتيبات علينا.”
