عشيقة جوزي – محمد نور
— حاسبيني بعدين…
بصل الورقة اللي في إيدي:
— يلا نجيب أبوكي الأول.
لقينا بابا في بيت صغير على البحيرة، على بعد ساعة من المدينة.
أول ما فتحت الباب، كان قاعد على الترابيزة ووشه مجهد جداً.
— بابا!
حضنته… ولأول مرة من سنين حسيت إني طفلة صغيرة.
— سامحيني يا سارة — همس بدموع.
— ليه مكنتش بتقولي يا بابا؟
— كل ما كنتي تبعدي عن الموضوع، كل ما تبقي في أمان يا بنتي.
— الخطة دي فشلت تماماً على فكرة!
ابتسم بتعب… وبعدين شاف أدهم واقف ورايا.
وشه اتغير.
— إنت…
أدهم وقف بثبات:
— يا جلال بيه.
— إنت شبه أبوك أوي…
— أتمنى تكون دي حاجة كويسة.
— في الحالة دي… أتمنى.
بابا فتح صندوق حديد، كان فيه هاردات وأوراق وصور.
— أبوك عرف الحقيقة متأخر أوي يا أدهم.
أدهم كان واجم ومبينطقش.
بابا طلع ملف:
— ليلة الحادثة، أبوك اتصل بيا وقالي إن حسام عرف إننا بنحقق وراه.
أدهم أخد الملف، وإيديه كانت بترتعش خفيف… دي كانت أول مرة أشوفه بيفقد سيطرته على نفسه.
— عندك دليل إن حسام هو اللي ورا الحادثة؟
— مش دليل مباشر… بس فيه سجلات تحويلات مالية لشركة حراسات قبل الحادثة بتلات أيام. وواحد من الموظفين هناك تم القبض عليه بعدها بسنين في قضية تخريب عربيات تانية لحساب حسام.
وش أدهم بقى أبيض زي القماش.
طول عمره كان فاكر إن عيلتي هي السبب في موت أهله… والحقيقة كانت العكس تماماً. أبويا كان بيحاول يساعد أبوه!
بصلي أدهم… مكنتش محتاجة أقول حاجة، نظرة الذنب في عينيه كانت كفاية.
كان ممكن نقدم كل حاجة للشرطة فوراً، بس حسام كان لسه معاه نفوذ وعلاقات في الشركة والبلد، وكان ممكن يخفي الأدلة.
عشان كده قصرنا السكة وقررنا نعمله كمين… وكان لازم نستخدم “نادين”.
قابلتها تاني يوم في كافيه هادي.
لما شافتني، رفعت حاجبها ببرود:
— جاية تطالبي بجوزك؟
— لأ.
قعدت قدامها.
— جاية أقدملك طوق نجاة.
ابتسامتها راحت.
حطيت ورقة تحويل بنكي على الترابيزة.
— حسام حول لشركة باباكي اتنين مليون دولار الأسبوع اللي فات.
مسكتش.
— وإنتي بعتي الصورة في نفس الليلة بالظبط.
— إنتي مفيش دليل دليل…
— مش محتاجة أدلة.
طلعت ورقة تانية:
— بس الضرائب والمباحث المالية ممكن يحبوا يعرفوا ليه شركة مفلسة بتاخد الفلوس دي عن طريق شركات وهمية بره مصر!
نادين اصفرت.
