رواية حمقاء ملكت ماكرا ج٣
آلاء: يااه بجد يارائد اللى حصل فى الكام شهر دول
غيروا في حياتى حاجات كتير أوى…..
رائد بخبث وهو يغمز لها: وياترى التغير ده حلو ولا وحش؟!!
آلاء: التغير ده أحلى حاجة حصلت في عمرى رغم كل المشاكل والتعب بس الحمد لله ربنا
عوض صبرى خير بيك ياحبيبى
وبحياتنا الجميله دى وبكره إن شاءالله ربنا هيرزقنا بأطفال حلوين شبهك يخلوا حياتنا أجمل وأجمل
رائد بارتباك: إن شاء الله ياحبيبتى..إن شاءالله
…………..
فى منزل محمود
منى بضيق : إيه ياضحى إتأخرتى ليه كده؟!
كل ده شغل؟!
ضحى بهدوء: معلش يا طنط كنت فى المحكمه وبعدين رجعت المكتب
لوت منى شفتيها وصاحت بتبرم: انا مش عارفه لازمه الشغل والبهدله دى إيه؟!! انتى مش محتاجه الشغل فى حاجه ياضحى
محمود غاضبا: فى إيه يامنى مركزه مع البنت كده ليه ماتسبيها براحتها
منى: فى ايه يامحمود مش طايقلى كلمه كده ليه؟!
محمود: عشان بتتدخلى فى اللى مالكيش فيه دى أمور بينها وبين جوزها مالناش دعوة بيها
ضحى بهدوء: معلش يابابا انا عارفه ان طنط منى خايفه عليا ومش عايزانى أتعب…بس انا بحب شغلى أوى ياطنط وأحمد مش معترض عليه …
منى: طيب براحتكوا ..كل واحد بينام على الجنب اللى يريحه
ضحى:
عن إذنكم هروح اغير هدومى عشان نقعد نتغدى سوا
وبعد الغداء
قامت ضحى بتنظيف وترتيب المطبخ ومعاونه منى فى بقيه أعمال المنزل محاوله منها لكسب ودها ولتغير تلك الصورة الملتصقه بذهنها عنها
كريم: بقولك إيه ياضحى انا زهقان ماتيجى اعلمك وتلعبى معايا ع¤يع¤ا على البلاى ستيشن
ضحى بمرح: تعلمنى مين …دا انا محترفه بابابا
كريم: ودى اتعلمتيها امتى بقى ان شاءالله؟!
ضحى : أحمد حبيبى علمهالى وكنا بنلعبها سوا كل يوم
كريم: طيب تمام يلا بينا نلعب أما نشوف مين اللى هيغلب التانى.
…………………
فى منزل كريمه
آلاء: إيه رأيك يارضوى في موضوع العريس ده؟! مفاجأة بالنسبة لك طبعا
رضوى: ولا مفاجأة ولا حاجه..ده فقع مرارتى ياشيخة بقاله شهر بيلمح من بعيد وانا عامله فيها عبيطه وبصبر نفسى لحد ما أشوف أخره إيه… بيضيع وقت ولا واخد الموضوع جد…
آلاء: آه منك ياسوووسه انتى..جننتى الراجل معاكى
رضوى ضاحكه: تصدقى ياآلاء والله ساعات كان بيصعب عليا ههههه بس قلت لازم اعمله اختبارات عشان اشوف قوة صبره وتحمله ههههه
آلاء: ان شاءالله هيطلع عليكى بعد الجواز كل اللى عملتيه فيه
رضوى بدلال: ميين عبوودى لا عبودى طيب وعسول خالص ومش هيزعلنى أنا عارفة
آلاء ساخره: عبوووودى…وانا جايه ومتوقعه تقولى مش موافقه ارتبط قبل التخرج
طلع الموضوع فيه عبوووودى ( وهى تقلدها بطريقة ساخرة)
صاحت رضوى بمرح: من فضلك مااسمحلكيش تتريقى على اسم جوزى انتى فاهمه!!
صاحت آلاء: جوزك مين يا هبله الراجل لسه بستأذن عشان يجى يتقدم خلتيه جوزك أوااام كده!!!!
رضوى: ايوه باعتبار ما سيكون إن شاءالله
وبعدين مفيش بنى آدم على هذا الكوكب ممكن يتحمل هبل اختك لكن عبودى اثبت
انه قد المسئولية دى وإن شاء الله ربنا هيعينه ويصبره هههههه
آلاء: ربنا يسعدك ياحبيبتى ويهنيكى أنا مبسوطه أوى إنك الحمدلله لقيتى أخيراً الضحية اللى هنلبسه المصيبه دى
صاحت رضوى بمرح : وربنا يسامحنا على الجِريمه اللى احنا هنعملها دى
انفجرت آلاء ضاحكه وصاحت: أمك دعيالك ياعبد الرحمن هههههه
