رواية حمقاء ملكت ماكرا ج٣
خرجت رضوى مع آلاء وهى تشعر بالغيظ من آلاء
رضوى: خرجتينا ليه ياآلاء كنت عايزة أسمع هتقولها إيه؟!
آلاء: مايصحش نفضل قاعدين وأكيد هى لو عايزة تتكلم مش هتتكلم قدامنا
اصبرى بس أما نشوف أخر الحكايه دى إيه؟!
رضوى: طيب أنا هرمى ودانى من بره وأسمع هتقولها إيه…
آلاء: ههههه ارميها يااختى..
…..
منى: بصى يا ضحى أنا جايه اتكلم معاكى كلمتين وافتحلك قلبي واكلمك بمنتهى الصراحة
ضحى بهدوء: اتفضلى يا طنط أنا سمعاكى
منى: أنا عارفة إنك مستغربه ليه طريقتى بقت قاسيه معاكى عن الأول
أنا ياضحى مش بكرهك زى ما أنتى مفكره
انتى يوم ماجيتى بيتى كنت بعاملك زى بنتى اللى مخلفتهاش والعكس انتى اللى كانت معاملتك ناشفه ومع ذلك اتحملت وقلت معلش دى ضحيه وباباكى فهمنا انك اتعذبتى كتير في حياتك ودى اللى مأثر على ردود أفعالك ومخليها ديما شديده وعصبية
نظرت لها ضحى بآسى وهمست: حضرتك شيفانى انسانه مش سويه مش كدة؟!!
منى: ممكن تخلينى أخلص كلامى للآخر وبعدين هجاوبك على أى حاجة تحبى تعرفيها
ضحى: اتفضلى يا طنط كملى ….
منى: أنا أم ياضحى ومفيش حاجه فى الدنيا عندى أهم من مصلحة ابنى
يمكن الاحساس ده انتى اتحرمتى منه فى حياتك مع والدتك الله يرحمها وصعب تفهمينى ..بس لازم تفهمى ان انتى وأحمد ماتنفعوش لبعض حتى لو بتحبوا بعض
بحق وحقيقى..الحب لوحده مش هيبنى حياه زوجيه سعيده
لازم يبقى فيه تفاهم واتزان فى التصرفات
ضحى: طيب ليه حضرتك بتحكمى عليا من دلوقتي؟!!
منى بحدة: أنا عشت معاكى ياضحى فتره تخلينى أقدر أحكم … أرجوكى مش عايزاكى تكونى السبب في خراب البيت إحنا بيتنا طول عمره بيت هادى وسعيد ما اتقلبش حاله الا من ساعه ماجيتى تعيشى معانا
أنا وباباكى بقينا مش بنبطل خناق ولولا وجود كريم كان يمكن انفصلنا بعد العشره
الطويلة دى…. كل حاجه بتتهد قدامى بسببك
وأحمد ابنى وأول فرحتى حاله اتبدل ومابقاش عاجبنى
ضحى باستنكار: انتى ليه بتحملينى نتيجة كل ده؟!!
ليه مايكنش عناد حضرتك هو السبب
كان ممكن كل البيت يكون مبسوط وسعيد
بكلمه واحده من حضرتك
منى بعصبيه: بصى ياضحى انا اقبل تيجى وتقعدى معايا فى البيت واشيلك على راسى من فوق بس بعيد عن ابنى فهمااانى
ضحى: انتى للدرجه دى شيفانى بشعه؟!
منى بغضب: اللى اعرفه انك بنت نجوى وتربيتها
وأنا مش هسمحلك تعملى فى ابنى اللى أمك عملته فى أبوكى زمااان
ابوكى اللى عاش عمره بيبكى بالدموع وهو مش عارف يوصلك ويفضل طول الليل يصرخ وينادى باسمك وهو نايم
مش هسمح ده يحصل!!! مش هسمح يبقى فى ضحى تانيه فهمااانى!!!
