رواية حمقاء ملكت ماكرا ج٣
…………………….
عادت ضحى من المكتب تحملها السعاده على أجنحتها وتطير بها محلقه فى سماوات شاهقه
منى : ازيك ياضحى النهارده
ضحى: الحمد لله ياطنط كويسه جدا
منى: ما شاء الله ملاحظه انك مبسوطه وشكلك فرحان خير يارب؟!
ضحى: بصراحه مبسوطه أوى أوى ياطنط الحمدلله أنا حامل
غمرت السعاده منى بسدة حتى ادمعت عينيها وصاحت: بجد!!! الف مبروك يابنتى
ياالف نهار أبيض ..ربنا يتم لك على خير
ضحى: متشكرة ياطنط
صااحت منى بأعلى صوتها: يامحمود!!!!!
خرج محمود من الشرفه فزعا
محمود بقلق: فى إيه يامنى ايه اللى حصل؟!
منى بسعادة : كل خير ضحى حااامل
ألف حمد وشكر ليك يارب
أقبل عليها محمود وضمها بين ذراعيه وهو يقول: ألف مبروك يابنتى ربنا يسعدك ويهنيكى
ضحى : تسلم يا بابا ربنا مايحرمنيش منك
منى: وعرفتى إزاى انتى روحتى لدكتور واطمنتى؟!
ضحى: انا كنت شاكه فروحت عملت تحليل دم امبارح وروحت النهارده جبت النتيجة الحمد لله
منى: فرحتى أحمد بالخبر الحلو ده ؟!
ضحى: طبعا انا أول ما استلمت النتيجه كلمته على طول وبشرته
منى: يبقى أكيد هيرجع النهارده من سفاجا
ضحى: هو قالى احتمال مايقدرش ياخد اجازة بكره فهيرجع على اول الاسبوع ان شاء الله
محمود: ان شاءالله يابنتى…
منى: ادخلى انتى غيرى هدومك عما أجهز السفره ومن هنا ورايح ياضحى مش عايزة حركه كتير عشان الحمل يثبت
ضحى: حاضر ياطنط وانا فعلا بلغتهم انى هاخد شهر اجازة
منى: خير ما عملتى ..
…………………….
عادت تحمل القهر بين طياتها محطمه الفؤاد ولكن برغم ذلك كاد بداخلها قبس خافت من أمل أن تكون يارا كاذبه فيما ادعت
لأنها لو كانت صادقة فيما تقول فهذا يعنى أنها وقعت ضحية لأكبر خدعه واجهتها على الاطلاق وأن كل أحلامها الجميله التى رسمتها كانت كسراب بقيعه حسبته ماءً ولما أتته لم تجده شيئا
جلست شارده لا تدرى ماذا تفعل
تواجهه بما علمت أم تنتظر حتى تتأكد من الطبيبه بنفسها
سمعت رنين هاتفها كانت ضحى هى المتصله
آلاء: ازيك ياضحى عامله ايه؟!
ضحى: الحمدلله ياحبيبتى بخير انتى اخبارك ايه؟
آلاء: الحمد لله
ضحى: مالك يا آلاء انتى تعبانه ولا حاجه
لم تشأ آلاء بالحديث عما يزعجها حتى تتأكد
بنفسها من صحته
فاجابتها: لا ياحبيبتى أنا كويسه الحمدلله
وحشتيني ..عايزه اشوفك ونقعد نرغى سوا براحتنا
ضحى: ياريت والله وعلى العموم ياستى انا فاضيه شهر بحاله نقدر نتقابل براحتنا
آلاء بدهشة: فاضيه شهر ازاى هو انتى خدتى اجازة ولا ايه ياضحى ؟!
ضحى: أيوة..خدت إجازة. واردفت بسعاده : انا طلعت حامل الحمد لله فقلت اريح شهر فى البيت لحد اما اطمن على الحمل
آلاء: الف مبروووك ياحببتي ربنا يتم لك على خير يارب
ضحى: تسلمى يا آلاء ربنا مايحرمنيش منك
وعقبالك ياحبيبتى
آلاء وهى تشعر بالمرارة والحسرة: تسلمى ياضحى
ضحى: إيه رأيك تيجيلى بكرة ونقعد براحتنا
آلاء: بلاش بكرة احتمال اروح للدكتور بتاعى خليها يوم تانى
ضحى : خلاص حددى اليوم اللى يناسبك وانا هستناكى
آلاء: ماشى.. ان شاءالله لما احدد هتصل عليكى وابلغك
ضحى: ماشى ياحبيبتى فى انتظارك ..سلام
آلاء: مع السلامه
