رواية حمقاء ملكت ماكرا جزء اول
وبعد يومين عاد رائد إلى البيت وتفاجأ
بصراخ وشجار بالداخل ويارا تصرخ
بصى ياطنط أنا مستحمله من أول الخطوبه
وساكته أنا اتخنقت
فسحه الخطوبه جيتى معانا بالعافيه
ودلوقتي عايزك تقعدى معانا كمان بعد الجواز …ايه القرف ده ؟!!
كريمه: عيب يا يارا أما تكلمينى كده أنا زى والدتك وعيب لما تعلى صوتك عليا بالشكل ده
يارا: أنتى هتعرفينى العيب من دلوقتي أمال لما تيجى بقى تقعدى على نفسى بعد الجواز هتقولى ايه؟! مش هيحصل على جثتى
كريمه: أنا يابنتى مش عايزه أروح ولا آجى
رائد هو اللى مصمم على كده
صاحت يارا : بصى ياطنط لو عايزه الجوازه دى تتم على خير ماتفكريش تيجى فهماااانى وده أحسن لكل الأطراف
ده لو عايزه تفرحى بابنك .
رائد بغضب: أعتبر ده تهديد؟!
صعقت يارا عندما وجدت رائد يسدد لها نظراته الحارقه وملامحه لا تنذر بخير
يارا: لا ابدا يارائد انت فهمت غلط الموضوع غير كده خالص
رائد: أمال الموضوع ايه فهمينى؟!
حتى لو رافضة وجودها معانا مش من حقك تتكلمى معاها بالأسلوب ده ولا الطريقه دى
يارا بغضب: هى اللى استفزتنى بكلامها يارائد
كريمة باستنكار: أنا يا يارا يابنتى!!!!!
رائد غاضبا: انتى كدابة أنا سامع الكلام من الأول…بصى يا يارا من البداية واحنا مختلفين فى كل حاجة وعمال أعدى بمزاجى ومتحمل ومش بدقق معاكى
يارا باستنكار: كمان انت اللى متحمل ؟!! أمال انا أقول إيه؟! ده زهقت وانت عامل زى لوح التلج و….
صاح رائد بغضب مقاطعا : يارا كل شيء نصيب….مع السلامه
يارا صا رخه: لا لا مش ممكن رائد انت بتقول ايه..دا احنا فرحنا بعد أسبوع!!!
كريمة: لا يارائد ياابنى استهدوا بالله ..ده شيطان ودخل بينكم
يارا بغيظ: البركه فيكى انتى السبب منك لله..
رائد: اخرسى خالص …واتفضلى اطلعى بره حالا
يارا وهى فى شدة الغضب: ماااشى يارائد بكره تيجى لحد عندى تترجانى أرجعلك
رائد ساخرا: في أحلامك
خرجت وصفعت الباب خلفها بقوة
كريمه بحزن: ليه كده يا ابنى دا احنا ماصدقنا
رائد: مكناش هننفع لبعض ياماما دلوقتي أحسن من بعدين
كريمه: غريبه إيه اللي رجعك بدرى؟!
رائد: كنت جاى اخد غيار لانى رايح اسكندريه
كريمه: ليه يارائد خير؟!
رائد: خير ياماما كنت هقابل ناس هناك تبع قضية عندى وارجع بكره الصبح بس بما ان ربنا رحمنى ومفيش فرح هقضى كام يوم هناك أغير جو
إيه رأيك تيجى معايا
كريمه: لا ياحبيبي روح انت أنا مش هقدر
على المشوار ده دلوقتي
رائد بقلق: مالك ياماما إنتى تعبانه؟!
كريمه: لا ياحبيبي أنا كويسة روح أنت بسلامه الله مشوارك وأنا هتصل على صفاء الممرضه
تيجى تقضى معايا اليومين دول عما ترجع
رائد: يكون أحسن عشان مابقاش قلقان
