رواية حمقاء ملكت ماكرا ج٢
حسام: بتطردنا ياصاحبى يوم كتب الكتاب أما يوم الفرح هتعمل فينا إيه؟!
رائد: هخطف العروسه وأهرب بيها من وشكوا
ههههه
خالد: الله يسهلوا …لا استاذ رائد بقى رومانسي وحبووب أمال ليه مربى لنا الرعب
بقالك كام سنه حرام عليك دا انت عقدتنى
ده انا بشوفك فى الكوابيس هههههه
رائد: لا ماتخافش أول ماارجع لكم المكتب هتحول تانى وأكمل عليك
خالد: الله يطمن قلبك طيب نستأذن بقى وكفايه رخامة لحد كده
رائد: رحم الله امرء عرف قدر نفسه
خالد: الله يكرم أصلك سلام ياعريس
رائد: سلام ياشباب …
دلف رائد لغرفتها بشوق وسعاده
واقترب من فراشها وعيناهما تتهمسان بلغة لم يفهما سواهما
انحنى لها وحملها بين ذراعيه وعانقها برقه
شهقت آلاء من تلك المفاجأة وتوردت وجنتيها بشدة وهمست: رائد ..انت كسفتنى موووت
قدام الناس اللى قاعدة
لكنه لم يهتم بأحد ..ولم يبتعد عنها..فحبيبته ونبض فؤاده فى أحضانه الآن فكأنما ملك الدنيا بأسرها بين ذراعيه
رضوى بمرح: احم احم نحن هنااااا
ناهد والدموع تملأ عينيها: ربنا يسعدكم ياولاد نفسى ازغرد ولا أرقص
سلوى بغيظ: يعنى كان حبكت وهى فى المستشفى
كريمه: يلا ياجماعه نخرج ونسيب العرسان براحتهم
وبالفعل قاموا وبدأوا فى مغادره الغرفة
كان رائد وآلاء مازالا يختلسان لحظات السعادة من عمر الزمان
ثم أنزلها رائد ببطء لفراشها وهمس لوالدته وهى على وشك الخروج
رائد: ماما!!!
كريمه: أيوة ياحبيبى..
رائد: روحى إنتى ورضوى أنا هبات مع آلاء الليلة دى
آلاء بحرج: رائد ازاى…ماينفعش…
رائد: زى ماقولتلك ياماما..
كريمه بفرحه: طيب ياحبيبى..تصبحوا على خير…
غادرت كريمه الغرفة وسط ذهول آلاء وارتباكها
التفت لها رائد باسما: إيه ياعروسة خايفة منى ولا إيه؟!
آلاء بارتباك: هتبات ازاى؟!!
رائد: عادى هبات فى السرير اللى كانت رضوى بتبات فيه ده… انتى قلقانة ليه؟!
وأردف ضاحكا ماتخافيش إحنا فى مستشفى مش هتهور ههههه
آلاء بحرج: لا بجد إنت اتغيرت أوى فى الشهر ده؟!
جلس بجوارها على الفراش وأمسك يديها بحنان ووضعها على شفتيه برقة
رائد: أنا خدت عهد على نفسى إنى عمرى
ماعدت أخبى مشاعرى جوايا تانى لازم تعرفى قد إيه بحبك ياآلاء…
ربنا يشفيكى ياحبيبتى ونعوض كل اللى راح مننا
آلاء باسمة: لا براحة عليا …واحدة واحدة مش هقدر اتحمل انفجار الأحاسيس ده كله فى يوم واحد
رائد: انتى لسه شوفتى حاجه…اممم بس مكنتش متوقع ان الفستان يبقى بالروعه دى
اكيد انتى اللى محلياه
سكت لثوان ثم انفجر ضاحكا
آلاء: إيه مالك يارائد بتضحك ليه ؟!
رائد: أصلى من الفرحة نسيت ألبسك الشبكة
أنا داخل عشان ألبسهالك أول ماشوفتك نسيت كل حاجه امممم ملحوقه ألبسهالك دلوقتي
مسك يديها برفق وألبسها خاتم الزواج(الدبله)
واسوار رائع يبدو عليه الفخامة والرقي
آلاء: بس ده كتير أوى يارائد
رائد: مفيش حاجة فى الدنيا ياآلاء كتير عليكى ورفع يديها وقبل باطن كفيها
