رواية حمقاء ملكت ماكرا ج٢
في منزل محمود
كان ملهوف للاطمئنان عليها فعزلتها في غرفتها قد طالت وأصبح يعتريه القلق
عليها لكنه لا يجرؤ على الاقتراب أو حتى طرق الباب
ولو لمجرد الحديث معها من الخارج
فهو لايريد أن يثير حفيظتها تجاهه وحتى لا تسىء فهمه فينقلب الامر ضده وتزيد الأمور سوءا بينهما….
كم كان يتمنى أن تكون الظروف
أفضل من تلك ويبادر بخطبتها لتتأكد بنفسها من جديته في الارتباط بها….
أحمد: أخبارك إيه ياكريم النهارده؟!
كريم: الحمدلله ياأبيه أخبارك انت إيه؟!
أحمد: الحمد لله أنا كويس…بقولك ايه ياكريم
ماتروح تقعد مع ضحى شوية أصلها حابسه نفسها في الأوضة من ساعة مارجعت
وكتر قعدتها كده غلط.
كريم: حاضر ياأبيه….
طرق كريم باب غرفتها فأذنت له بالدخول
كريم: إيه ياضحى ياحبيبتى..حابسة نفسك
ليه كده؟!! تعالى اقعدى معانا
ضحى: لا انا كنت نايمه مش حابسة نفسى ولا حاجه…هلبس هدومى وهحصلك
كريم: ماشى ..يلا هستناكى
خرجت بعد دقائق فوجدت أحمد جالسا في الصالة وحيدا
ضحى باستغراب: أمال فين بابا وطنط منى؟!
أحمد: عندهم معاد عند الدكتور وزمانهم راجعين
كريم: اقعدى ياضحى واقفة ليه؟!
أحست ضحى بالحرج لعدم وجودهم في المنزل فاندفعت هامسة: لا أنا هدخل أوضتى عما يجوا
زفر أحمد بغضب: خليكى ياضحى أنا داخل أنا أوضتى أنام اقعدى براحتك..
ادركت أنها اغضبته بجملتها الأخيرة وأوصلت له معنى أنها مستاءة من وجوده ..وهى لم تقصد ذلك
أردف أحمد: على العموم أنا راجع شغلى بعد يومين ومعدتيش هتشوفى وشى لمدة شهر كامل
ضحى بارتباك: لا ياأحمد انت فهمت غلط…مش قصدى حاجة والله…
كريم: اقعد ياأبيه معانا …ماتبقاش قفووش بقى
ضحك أحمد : بتقول ايه ياكريم…إيه قفوش
دى؟!
كريم بمرح: قفوش دى صيغه مبالغة من قفش قافش قفوش
أحمد: لا ياشيخ..
كريم: آه والله دا انا مذاكر عربى كويس
أحمد : لا طمنتى عليك والله
ابتسمت ضحى بهدوء : اه عندك حق يا كريم هو قفوش فعلا
أحمد ممازحا: لا واضح ان فيه اجماع على كده…مكنش العشم
ثم التفت لها متسائلا: انتى مش ناوية ترجعى الشغل بقى ياضحى وتغيرى جو…؟!
ضحى: أه إن شاء الله ناويه من بكره أرجع الشغل انا فعلا محتاجه أغير جو
أحمد: طيب تمام دى بداية كويسة
أنا متأكد انك هتقدرى تعدى المرحلة دى بسرعة..
ضحى: إن شاء الله
أحمد: ايوه خدى خلى عندك أمل في الله
وان شاءالله الجاى أحلى
ضحى بشك: تفتكر؟!
أحمد: طبعا..ربك مابينساش حد
ضحى: ونعم بالله…..إنت خلاص راجع شغلك؟!
أحمد: أيوة الحمدلله الدكتور طمنى إنى أقدر أرجع خلاص
ضحى: تروح وترجع بالسلامه
أحمد: الله يسلمك يا ضحى
