رواية حمقاء ملكت ماكرا ج٢
……..
قام رائد بتوصيل آلاء ورضوى إلى محل سكنهما
كريمه: مع السلامه يا بنات فى رعاية الله
آلاء: متشكرة جدا وأسفة على التعب ده
رائد: مفيش تعب ولا حاجه..المهم هستناكى بكره فى المكتب أوعى ماتجيش..عارفه الساعه عشره لو ماكنتيش هناك عشره ونص هكون هنا وهاخدك بالعافيه
ابتسمت ضاحكه: لا خلاص ان شاءالله جاية الطيب أحسن ….عن إذنكم
كريمة: اتفضلوا….
بقى واقفا بسيارته حتى اطمأن أنهما صعدا
إلى تلك البنايه بأمان
رائد: ها ياحبيبتى تحبى نروح على طول و لا
ايه؟!
كريمه: لا خدنى كده في مكان هادى أشم الهوا واقعد معاك وافضفض براحتى
وبعد مده قصيره وصلا حيث تريد
رائد: ها ياماما تحبى تتكلمى في ايه؟!
كريمه بخبث: ما أنت عارف يارائد أنا عايزة أتكلم فى إيه؟!!!
رائد: اممم تقصدى آلاء
كريمه: أيوه آلاء دلوقتي فهمت حالك مقلوب ليه بقالك مده….بتحبها يارائد؟!
لمعت عيون رائد بفرحه وارتسمت على ثغره ابتسامة سعادة: أوى ياماما بحبها اوي مش عايز أقولك أنا فرحان قد إيه انى لقيتها وهترجع تشتغل معايا تانى..انا بحس انها تخصنى..مسؤله منى…لما مشيت ماكنتش حاسس لحياتى معنى ولا لون غير لما شوفتها
تانى النهارده
كريمه: للدرجه دى ؟!!! طيب.ممكن أعرف إيه حكايتها؟! أنا سيباكوا من الصبح تقولوا كلام مش فهماه
ومش عايزه اتدخل وقلت انت تفهمنى بعدين
رائد: من عنيا ياست الكل أنا هحكيلك كل حاجه من أول يوم شفتها لحد النهارده
ثم ضيق عينيه وأردف بس على شرط
كريمه مبتسمة: آاااه بدأنا شغل المحاميين.. انت هتتفاوض معايا ياواد انت؟!
رائد مبتسما: ياستى اعتبريه اتفاق مش تفاوض
كريمه: هااااا قول عايز إيه؟!
رائد: عايز أعرف كل حاجه عرفتيها في النص ساعه اللى نزلتها
كريمه بشك: ولو قولتلك هتقوول؟!
رائد: انتى مش واثقة فيا ياماما ولا إيه؟!
كريمه: اصل انا عارفاك مكار ممكن تاخد منى وتخبى عليا
رائد ضاحكا: ماتخافيش يا ستى هقولك
ها طمنينى..عرفتى هى هربت ليه؟!!
وصرفت الفلوس فى إيه بسرعه كده؟!
كريمه: لا صرفت ولا نيلة الفلوس دى كانت استلفتهم عشان تعمل عمليه لابوها الله يرحمه
ضرب رائد جبهته بكفه بخفه وصاح: اخخخ دا أنا على كده ظلمتها أوى ازاى ماجاش في بالى حاجه زي كده؟!
ها وقالتلك إيه تاتى؟!
كريمه: هى قالت حاجه؟؟!!! انا عرفت الكلام ده من أختها
كده فى الخباثة اما راحت تصلى الضهر
رائد: ااااااه فهمت
كريمه: الحمد لله…جه دورك بقى تحكيلى الحكاية من الأول
رائد: ……
…………………..
ولجت الفتاتان لغرفتهما ومازالتا تحاولان استيعاب ذلك اليوم الطويل المثير للعجب والدهشة
رضوى: اللى حصل النهارده ده ولا أفلام السيما ….بس شوفتى لو كنتى سمعتى كلامى من الأول وروحتى لأستاذ رائد كان ساعدنا
وماكنتيش اتبهدلتى كده…بس اقول عليكى ظ±يه؟!
آلاء: ومين قالك انى مبسوطة دلوقتي انه ساعدنى؟!!
رضوى بدهشة: يعنى انتى مش فرحانه ان الغمه دى هتنزاح وهتقدرى ترجعى لشغلك وحياتك تانى؟!!!
آلاء: مش بالظبط كده بس ده معناه إنى هفضل تحت رحمته ومده طويله كمان
انتى عارفه لما يقسط لى المبلغ ممكن أفضل مجبرة أشتغل عنده قد إيه؟!!
رضوى: ياستى اشتغلى زى ماتشغلى..هو حد طايل يشتغل مع الاستاذ رائد…ده زى السكر
آلاء ساخرة: اه فعلا ما انتى ماشوفتيش السكر اللى كان بيرشه عليا النهارده؟!
رضوى: لا بس شوفت قد إيه الراجل مهتم بيكى وخايف عليكى
ده البنت اللى كانت خطيبته وقفت عشر دقايق أخدت بالها عايزه تقنعينى ياسوسه انك مش واخدة بالك؟!!!
آلاء بقلق: انتى لسه صغيره يارضوى ومش فاهمه الدنيا كويس وكمان إنتى ماتعرفيش رائد زى ماأنا عارفاه عشان كده مش مطمنه
رضوى: لا معلش واحدة واحدة بقى ماله رائد
الراجل عنيه بتقووول بحبك ياآلاء بحبك خلى عندك دم بقى ياشيخة ههههه
انفجرت آلاء ضاحكه: يخرب عقلك فصلتينى
رضوى: لا ماأنا لازم أفهم بقى مش عاجبك في إيه ده ألف. واحده تتمناه شوفتى يارا
كانت ماشيه وهتموت عليه ازاى؟!
احمدى ربنا انه بعتلك واحد زى ده
آلاء بقلق: بصى يارضوى رائد عامل زى موج البحر كده… ساعة هادى ورايق وجميل وفجأة ينقلب حاله وموجه يغرق أى حد
عشان كده بقولك خايفة …أنا بظروفى دى وحياتى اللى انتى عارفاها ممكن أقدر أتحمل واحد زى ده؟!! ده بكلمة منه دلوقتي ممكن يدمرنى
انا بالنسبه له حاله جديده اول مرة يقابلها فى حياته واحده دخلت مكتبه تسرق منه ملف مين يتجرأ ويعمل كده مع رائد الفقى ؟!!
لفت نظره يومين والموضوع هيروح لحاله زى مابنشوف في الأفلام
رضوى: يمكن ياستى القصه معاكى تختلف
آلاء: مش بقولك انتى ماتعرفيش رائد زى ماأنا عارفاه رائد مش الرومانسى اللى انتى متخيلاه بالعكس ده شخصية عقلانية جدا
ومشاعره مش بتتحكم فيه وديما بيفكر لبعيد
أوى وده مش صح ديما
تخيلى انه افتكر انى انا خططت انى اروح عنده البيت وهو مش موجود واسرق منه ملفات!!!
رضوى: ماهو معذور برده يا آلاء.. بصراحه اى حد مكانه هيشك
زفرت آلاء بضيق وشردت قليلا واردفت: على العموم كل الكلام ده مش هيقدم ولا يأخر
أنا خلاص مصيرى دلوقتي ارتبط بيه بمزاجى أو غصب عني على الاقل لحد لما اقدر أسدد الفلوس اللى هيدفعها عنى ولحد ما ده يحصل مش عارفه ممكن تودينى فين الايام معاك يا رائد… ربنا يستر!!!!
